杜汶澤今日又係 Facebook 開 PO 回應程美段欠薪事件，佢認為程美段咁做係篤佢背脊，毫無道義可言，而且從來沒有承諾出糧時間，仲話娛樂圈呢一行，三個月雖然不算早，但在行業當中，絕對不算遲。另外，杜汶澤又力撑總經理黎先生(豪仔)，話豪仔多年盡忠職守，上刀山落油鑊，絕對唔會因為此蚊型疏忽，而對佢有任何不滿！
程美段見到回應後就 PO 咗佢同豪仔嘅 whatsapp 對話，從文字及錄音均清礎顯示豪仔應承人拍完一個星期就出糧，confirm咗出糧時間及人工，程美段才應承接拍呢個job！
程美段回應全文:
就今日杜汶澤先生再發文一事，當中有提到「從來沒有承諾出糧時間」一句，直接關係到我。因為呢個說法，最後推論都係返到去我搏見報，所以雖然一直有錄音做証，但都唔想事件再發酵而拎出嚟，但宜家杜先生一口咬定「從來沒有承諾」，我選擇公開錄音，至少還自己一個公道。
錄音請點擊短片。
————-我又是分隔線————-
我入行資歷雖淺，但每次做JOB都盡量與人為善，每一次傾好嘅Payment，我都按時跟進，無論大眾認為我平時作風如何，評價如何，形象同行內操守我都盡量配合，因為呢個行頭我深明「山水有相逢」，所以好多人成日傾Job都會話「遲吓大把合作」，我都樂意相信，價錢合理便可，好來亦想好去。
大家見杜生文章，亦見豪仔算係LateShow開山功臣，二號人物。由豪仔口頭承諾「一星期」到最後萬水千山完成Payment「三個月」，二號人物都忙碌到對我十日內只得一個訊息回覆，一間公司到底邊個簽名同幾時出票，最後決定嘅人會係邊個？基於呢幾個疑問，我選擇唔直接搵杜生。
至於「唔搵杜生而直接搵記者」一事，之前同01記者傾，佢亦有向杜生了解呢件事，而了解後亦都未必會出呢單新聞。最後杜生先喺Facebook向我開炮，蘋果再第一手報導，最後仲訪問埋我前經理人。
事實陳述就係咁，大家想點去理解，我本人唔介意。
上次亦有提到，杜生曾有意簽我成其藝人，但商談後，我都婉拒推卻。要拎一個有意簽我嘅當紅大明星嚟搏上報，呢個邏輯我實在唔可以理解。而且杜生喺連登一向有唔少粉絲，孔子同亞里士多德都曾經講過，「誰大誰惡誰正確」，為咗上一次報紙，我需要大費週章到呢個地步？本來揮筆一簽就可以做到嘅事，我點解要冒險同網民為敵？
記者就好似藝人一樣，有好亦有壞；
記者藝人一向唇亡齒寒，並唔係大明星搵記者就合理，我哋呢亭奀星搵記者就十惡不赦，于理不合。
杜生自比「威風八面」，而我都只求「自食其力」，
是是非非，我唔介意辯白，但只要再有新嘅指控，我亦隨時恭候。
抱歉照舊不再私下回應任何媒體，亦無意用Page呃like，只用此戶口作回應平台，不便之處，多多包涵。
程美段欠薪事件懶人包:
1月20號，豪仔喺 whatsapp 同程美段 confirm 拍攝時間、人工、出糧日期，程美段應承接拍
1月22號，程美段到 LateShow 進行所有集數拍攝
4月 4號 ，程美段 whatspp 豪仔，查詢 $9,000 人工幾時有 (但豪仔已讀不回)
4月 6號， 程美段再追問一次豪仔(豪仔維持已讀不回)
4月10號，豪仔終於回覆，今日會開票俾程美段，問佢抬頭寫咩，程美段即時回覆
4月14日，程美段未見出糧，離開香港前再問一次豪仔，但又係已讀不回
4月24號，LateShow 終於出糧俾程美段 (豪仔無通知，程美段亦無check)
4月26號，程美段以為仲未出糧，就同記者講做 LateShow 筆錢仲未收到
4月27號，記者向杜文澤查詢拖糧一事，佢即時向豪仔了解成件事，佢睇到收據以為4號已經入數，但原來收據上24號嘅2字印唔清楚，所以佢同記者解釋 4號已出糧。杜文澤當日嬲到爆，一日內連開兩PO串爆程美段搏見報，未出糧唔揾佢先，而係去揾記者，又叫同行小心佢。程美段見到程美段回應，夜晚亦發長文及cap圖解釋。
4月28號，網民原先係幫杜文澤，覺得程美段明顯搏見報，但睇完程美段27/4 晚嘅回應，覺得程美段好慘，賣肉錢都拖數，追數又已讀不回，同記者講下，杜文澤又公開叫行家小心呢個人，咁大個人仲要恰個小妹妹。
4月29號，網民愈鬧愈激烈，愈來愈多網民在杜文澤留過言嘅 Facebook Page 上指罵，有網民發起取消訂閱行動，下午杜汶澤第三次回應拖糧事件。
相關新聞:
|
鍾意就快D Share啦！
|
|
|
