有網民在 Facebook Group「Tai Po 大埔」開PO，佢話今早喺大快活今早餐，見到一位伯伯失平衡跌倒，頭部嚴重出血，佢即刻打 999 報警，並留守照顧伯伯，等待救護員到場先走 … 期間佢打返公司交代情況，公司同事竟然反問: 「點解係你報警唔係職員報呢？都係當你遲到囉，公司冇呢類情況指引。」
樓主最後都無遲到，但就因為呢件事感到好無奈… 佢係想盡一點公民責任，幫下有需要嘅人，但究竟香港由幾時開始變到「返工第一」？真係世界末日都要返工 ?!
原文:
今朝返工前於某大快活食早餐，有位伯伯失平衡跌倒，頭部嚴重出血，我見況報警。非常感謝現場有兩位先生女士幫手照顧傷者。不久商場保安亦到場。
留低資料後，警察巡例叫我地留守現場協助，直至救護員到場。
由於差不多過返工時間，我WS相片及打電話返公司交代情況，並問公司呢種情況下遲到點處理，同事竟然反問我：「 點解係你報警唔係職員報呢？都係當你遲到囉，公司冇呢類情況指引。」
其實只係盡公民責任，普通市民都報得警架嘛下話？
事後協助的女士都抱怨佢不斷叫其他幫手報警都冇人願郁，現場得我地三人及遲來既保安幫呢位伯伯，其他人包括現場職員冇一個肯幫手，做野既繼續做野，返工既食完就閃人，街坊繼續做塘邊鶴。
見到以上公司同周遭人對事件既反應都覺得幾婉惜。香港人「返工第一」呢種特質非一朝練成，而且促成社會既冷漠程度，要多得各大財團、老闆政策催化，仲要多謝政府對社會上好多「揾朝唔得晏」既實況繼續視而不見。
（補充返，救護員到場，小弟離開後都趕得切最後一分鐘打咭，多謝各位關心🙏🏻)
網民回應:
「可悲的社會」
「」公司冇呢類情況指引』 指引係死嘅人係生嘅, 真心覺得你做得好岩，撐你! 希望伯伯無事」
「香港人你地只係老闆既賺錢工具， 請唔好學人講咩社會責任， 你地應有既社會責任就係返工， 唔好遲到，幫老闆搵錢就夠」
「我上司係依方面係有情講，上次又係類似情況，佢話會幫我同人事部講返豁免遲到」
「就係因為有樓主呢d咁垃圾既公司，香港人先越來越怕事。祝樓主盡快轉好工，好上司，好同事。」
「香港人越來越冷漠，可幸還有樓主或有心人幫忙」
「我早幾日落好大雨都見到有個揸住拐杖嘅婆婆無遮，濕晒，佢一定已經行左段時間，沿途竟然無一個途人諗住遮埋佢。個日係星期六黃昏所以應該唔關趕返工事。平時都發現好多小事其實香港人都好涼薄，好多人都好自私，雖然係好可悲，不過仍然有好多好心既人，希望大家都唔好咁吝嗇同埋教育下一代要分享愛俾身邊嘅人！」
「上班時間巴士有女仕比人非禮，每一次都有大量乘客講哂粗口話受害者多事，阻住番工。」
「我都試過，坐80K有個女人發羊吊，個口嘔泡嘔血。我見到就打999報警，同車長講個車長問我想點? 我同999嗰邊講好位置call白車黎，叫車長停埋一邊。成架車得我同另外一男一女幫手。最仆街係停埋一邊之後，有乘客話點解唔去新城市(下站)先攪，阻住佢落車。」
「呢D情況，我發生過，唔同是我係職員，call白車，最後伯伯冇事，同佢屋企人感謝我! 但公司就pk我，因公司上司要寫報告，又話保險……」
「寧遲到扣錢/被炒，我都唔會見死不救，幫到就幫！要記住呢到係香港，如果我地好似大陸d人咁見死不救，咁我地無資格叫自己係香港人」
|
鍾意就快D Share啦！
|
|
|
