真人騷 魔術師的心聲 甄澤權：呃你都係希望你笑番聲啫！
是這樣的，訪問新聞人物魔術師甄澤權（ Louis）這一天，我和攝影師要從九龍趕到香港連走兩場。
不是說連走兩場有多辛勞，而是在九龍傾完幾粒鐘，再過港島傾多幾粒鐘，疲乏是真的，提不起勁也是必然的……
直到拍照空檔，看到 Louis在咖啡店裡凌空飛起支飲管，再在 0.01秒裡把階磚 3變做煙士，我和攝影師當堂醒哂：「點解嘅？！好犀利呀？！」
「好多人話魔術師係呃人嘅行業，係嘅，我哋呃你都係希望你笑番聲啫、拍下手啫……」
32歲的甄澤權這個星期俾人爆料、起底又抽水，好明顯已經出名已經出到怕，說其他，他思前想後戰戰兢兢很怕再惹事生非，說到這裡倒是堅定得很。
我想話，咖啡室係我約，飲管是咖啡店裡隨手拿的，副啤又係現場問老闆開聲借的，我和攝影師當然唔係媒， Louis背後也沒有人鬼鬼祟祟遞緊杯麵……
那 0.01秒我見到的是魔術師背後的十年苦功，那一下沒有預期的醒神和興奮，我覺得無價，我覺得每個人都需要。
一夜之間似坐過山車
疏忽，係唔係一個魔術師最不應該犯嘅錯？
咁呢個就無得賴……真係疏忽咗。（當然講緊杯麵事件）第一時間有條片流出，我本來最擔心係驚魔術秘密俾人知道，呢個係魔術師最唔想發生嘅事，即刻問下D朋友點樣處理好，跟住好快過咗兩、三個鐘已經有記者打嚟問，幾個鐘頭之內，已經遠遠超過我本來擔心嘅嘢。
係喎，由一個魔術變咗開始起你底、挖你黑材料？
呢個真係始料不及，點解由睇魔術嘅好奇，轉咗落對我個人關注？但係我最擔心嘅嘢始終冇發生，我本來最怕因為呢件事，個個一窩風出嚟踢爆魔術秘密，好彩……魔術師們都係有職業操守。針對我自己嘅，本來都有諗過逐一反擊、攞曬啲證據出嚟，最終都係算。我講嘢唔叻，費事又講多錯多，與其同人爭論，都係用呢個時間調適自己重要啲。
咁到底有冇整容？
梗係冇……（女助手代答：「嗰張相我哋啱啱搭完長途機，冇化妝又冇執過相梗係爭好遠。」）
魔術界肯定唔係第一日發生呢種事，其他名魔術師遇到呢啲嘢點處理？
我又唔方便去講其他人，但外國、內地肯定有發生過（穿崩），就係要睇你點應對，再練好啲魔術先、捱過咗呢一關先，人生又會去到另一個位置。
事業高潮同最低谷喺幾日之內一齊發生？
點講呢……你知唔知呢個節目收視喺電視台好好（平均 22點啫，依家確係可以叫好好嘅！）？真係好高！上個星期五晚最後一集，成個團隊好開心，兩個月晚晚唔瞓嘅結果終於做得成、終於出咗街……一晚㗎咋，好似坐過山車一樣，星期六條片就上咗網，就係一晚……不停怪自己，點解咁大意？點解嗰啲位會疏忽？
前一日大家仲針對緊吳若希煩音，第二日就掉轉槍頭對你。不過疏忽完仲出名過以前！
呢件事我係好介意，但係朋友咁安慰我，有啲話我冇價值就唔會有咁多人去講，有啲人叫我好好享受呢幾日，可能一世人焦點就係呢幾日，又有人話應該當呢件事係一個踏板……你哋可以咁諗，但我當然希望，有得揀嘅話，呢件事冇發生。
最怕以後冇人睇我
你係悲觀定樂觀嘅人？
老實講，我係一個比較悲觀嘅人，呢件事我會做最壞打算。最壞嘅打算就係，冇人再想睇我做魔術。發生件事以後，我做每一步都諗得比以前多，臨出台之前不斷諗，句說話應該喺咩位講、個企位應該係前啲定後啲，鋪排又好唔好改下呢？完全唔同以前，完全唔識放輕鬆。
有冇影響你最近嘅表演？
上台諗好多，瞓覺又諗好多，最壞就係咁，冇人再睇我表演，我係唔係要轉行呢？但係轉行又做得啲咩呢？我除咗魔術師，從來冇做過其他全職工作。
你得唔得？真係衰咗，你可以從頭做起嗎？
冇得唔得，都要生活，心唔舒服可能會，但係都要食飯㗎。
32歲人，係唔係最低潮今次？
係，以前啱啱畢業（澳洲 University of Wollengong）開始做全職魔術師，冇工開成日會，冇收入係辛苦啲，但我唔覺得係低潮，因為開始做魔術師我就預咗條路難行。但今次唔同，我依家至知，原來我叫咗兩隻腳踏咗落娛樂圈，冇得返轉頭。
呢個世界就係有呢種人，係要玩踢爆，你有咩同呢啲人講？
魔術唔係法術囉！電視畫面
14年世界魔術巡迴之旅
《蘋果日報》圖片
台慶斬半胡杏兒
《蘋果日報》圖片
一定有，睇魔術嘅人當中一定有呢啲人，想知「點解嘅？」……試下享受啦。魔術的確係有爭議性嘅表演，好多人話魔術師係呃人嘅行業，係嘅，我哋呃你都係希望你笑番聲啫、拍下手啫……佢哋唔鍾意魔術，佢哋唔鍾意我嘅魔術，講係冇用嘅，我會做，希望用我小小嘅能力，多啲又多啲，令香港鍾意睇魔術嘅人多咗。
係人都知魔術唔係真，你學緊嘅時候、表演嘅時候，有咩令你著迷？意義喺邊？
一種係我得到嘅，嗰種成功感、嗰種優越感，掌聲同讚嘆，一種係我帶俾人，嗰種笑容，嗰下嘩嘩聲，其他表演帶唔到。
一個月賺五百都係咁過
點解會走入魔術界？
大學，我又唔想去嗰啲人人都會入嘅 club，就揀咗魔術學會嚟入，冷門啲，得十零廿個成員。咩人都有，但其實成個 club人人都唔識，大家都係由頭開始。第一次接觸，嚴格嚟講早過大學，我小四、小五時，老師叫咗我同另一個同學返去練魔術，然後揀一個喺聖誕聯歡表演。返屋企我即刻叫媽咪幫我買道具，返到屋企狂練，結果第二日老師冇揀到我，我輸俾個肥肥哋嘅男仔，可能佢生得得意啲、有喜感啲啩……從此之後我就再冇掂過，直到大學。
邊間大學讀邊科？
浸會、讀 marketing，我讀書唔叻，冇任何嗜好，樣樣嘢都係三分鐘熱度，大學揀科、同未來做乜，完全冇興趣，好自然就 take一樣大路啲、穩陣啲嘅 marketing嚟讀。我樣樣都唔學得耐，唔知點解係魔術，可以喺房四、五個鐘就喺度研究。
一開始條路有幾難行？
大學年代我係魔術學會會長，去 O-camp去學校表演，當然冇錢，純攞經驗，為咗宣傳魔術學會，當幫人。呢啲人到我畢業後亦都幫番我轉頭，開始有錢收去私人派對、政府嘉年華。但係呢啲嘢唔會成日有，有好長一段日子，我每個月都係得一個 job，每個月都係得五百蚊收入。
堂堂大學生，搞到一個月賺得五百蚊，你唔搵番份正職，都幾任性。
我爸爸退休前喺中學教經濟，估都估到爸爸媽媽一定反對、一定會話：「搵份工啦，魔術師點搵食？點會做得好？」佢哋唔使我養家，淨係基本要求想我養得起自己。唔知點解，我覺得自己會得，一直好堅持，我唔係叻過人、唔係聰明過人，我淨係相信自己有朝一日會做得到。我叫爸爸媽媽俾兩年時間我，呢個係我俾佢哋嘅兩年協議，兩年後仲唔得，我就老老實實去搵份工。
一個月得五百蚊，日子點過？
一個月淨係得一個表演，每個表演淨係得半個鐘，其他嗰廿九日我咪唔出街囉，日日匿喺屋企練魔術。嗰陣時已經喺大學識咗女朋友，拍拖咪又係叫佢唔好去街囉，返多啲屋企囉！
拍拖唔好睇戲喇，返屋企睇我變魔術？
一定係，次次練完，屋企人、女朋友都係我嘅實驗品，開飯前齊人：「喂大家，唔好食住先，睇下我新練嘅魔術！」但冇錯，對得多都厭，開頭幾個月大家都開心，睇得多都照食飯冇乜人理我。係好唔實際，但女朋友係支持嘅……因為佢從來冇見過咁認真，對一樣嘢咁沉迷，屋企人同女朋友都係因為咁，由覺得唔實際到開始尊重魔術師，開始尊重我嘅夢想。
玩嘉欣反被嘉欣玩
電視畫面
港版大衞高柏飛
圖片
女朋友話：冇整容！《蘋果日報》圖片
不變應萬變
玩魔術係為溝女？好膚淺囉…… Louis話次次玩魔術，女仔最快圍埋嚟，不過嘩完一輪，最快散開又係佢哋，只淨番班想佢過兩招嘅男士。
我問佢當年搵緊五百蚊一個月時位女伴依家去咗邊？佢吞吞吐吐，望望身邊位女助手，話都係唔好講。
最後謎底解開，其實唔使解都估得到，整個訪問，有誰比 Louis更緊張？
十幾年來魔術變了千千萬萬，女朋友遠在天邊，近在眼前，怎麼變也變不走。
|
鍾意就快D Share啦！
|
|
|
