Pokemon Go大熱，個個化身精靈訓練員，個個都想擁有稀有精靈，或是將手上精靈進化成強勁的精靈。相信好多人都面對呢個問題，咁多精靈，升級邊隻好？尤其是每次升級都會用不少星塵及糖果，胡亂升級只會浪費道具。
根據經濟學的成本效應益，就係要成本少，效益高。用在培育精靈上，就係升級材料少，或是坊間好易搵到材料，而培育出來的精靈CP值又夠高，咁先合乎成本效益。另外，官方表示未來正研究開通交換精靈功能，一旦成事，就會變成商機，閣下手上培育的強勁精靈隨時賣到好價。
咁究竟邊啲精靈最值得培育？係人都知夢夢、超夢夢勁，不過好多人見到未見過，更何況話升級。所以今次小編揀出的八隻精靈，都係大家可以培育到，一啲都唔離地的精靈，大家一齊睇睇。
1. 啟暴龍
啟暴龍人人都想得之，是現時綜合能力最強的小精靈。無它，皆因佢攻又得，守又勁。啟暴龍的攻擊(Base Attack)為250，擁有現時最強攻擊力，而防守(Base Defense)亦非常利害，有212，亦為第二強。
要培育啟暴龍，可以從迷你龍著手，至後進合至哈古龍，最後是啟暴龍。不過要捉到迷你龍都唔容易，因為出現率較低，據說迷你龍會較多機會出現在海旁，由迷你龍進化至哈古龍要25粒糖果，由哈古龍進化至啟暴龍又要100粒糖果，要儲其實都唔太容易，。不過佢攻防力都咁強，點都要培育下既。
2. 水箭龜
講完最強攻擊，自然要講最強防守，主角就係水箭龜，被逾為「最強之盾」，防禦力達222。
水箭龜據說可以係屯門捉到，但如果想靠進化，就可以從車厘龜著手。車厘龜是主角之一，又可愛得一個極點，所以車厘龜出現的頻率較多，在遊戲開始，三隻可以選擇的精靈之中，車厘龜都是其中之一。另外，大家可以透過孵2KM的蛋入手。
與啟暴龍一樣，水箭龜同樣要經過兩次進化，先由車厘龜進化至卡美龜，然後再進化至水箭龜。所需糖果分別是25及100粒。由於車厘龜出現頻率較多，所以進化難度會較啟暴龍低。
3. 最易升級 - 大口蝠
波音蝠出現之多是人皆有知，唔好睇波音蝠咁多咁煩，但正正因為佢夠多，所以好容易獲得糖果升級，成為大口蝠。
只要你捉到一隻或提升一隻波音蝠CP值至311 CP值，就可以進化成一隻過千CP值的大口蝠，所需糖果50粒，但只需進化一次，可說是最易進化的精靈。
4. 大比鳥
波波可以話係繼波音蝠來說，出現率第二高，非常容易儲「糖果」，而且可以直接由比比鳥進化成大比鳥。只要先提升至擁有或捉到CP值達303的波波，或CP值達568的比比鳥，就可以進化至過千CP值的大比鳥了。
由波波進化至比比鳥需要12粒糖果，由比比鳥進化成大比鳥則要50粒糖果。
5. 大力蛙
身為水系和格鬥系的大力蛙擁有不俗的防禦力，達202 ，防守力是現時精靈中排行第5。但原來要培育大力蛙一啲都唔難。佢係由蚊香蝌蚪進化成蚊香蛙，再進化成大力蛙，所需糖果是25及100。不過由於蚊香蝌蚪周不時都會出現，而且十分易捉，可說是十分抵培育的精靈，用大力蛙來守道館都是個不錯的選擇。
6. 鯉魚龍
鯉魚王通街都係，小編有次去捉精靈時，同一個pokestop出現4條鯉魚王。不過，進化到鯉魚龍要用400粒「糖果」，亦即是要捉100條鯉魚王再賣走，才夠糖果進化。
雖然有人話進化鯉魚王要咁多「糖果」好唔抵，但只要先提升至擁有或捉到CP值達79的鯉魚王，再去進化，就得到CP值過千的鯉魚龍了。雖然捕捉鯉魚王過程需時，但要培養進化成鯉魚龍的過程其實幾簡單。
7. 水伊貝/火伊貝/雷伊貝
想要一隻戰鬥力高又可愛的小精靈非伊貝莫屬，伊貝可以進化成水伊貝、火伊貝或雷伊貝，可是進化成邊種伊貝就是電腦隨機的。
如果想特定要一種伊貝，就要在進化前幫它改名，在進化前將它的名字由Eevee改成相應的名字，如將雷伊貝改名成Sparky；水伊貝改名成Rainer；火伊貝改名成Pyro，之後再按進化按鈕，就可以得到你想要的伊貝！
在進化的伊貝中，火伊貝的攻擊力則是最強，達238，只是僅次於啟暴龍。而伊貝又唔太難捉，小編升到11 level，就可以經常捉到逾100 CP值的伊貝，有時仲接近300 CP。
而伊貝只需進化一次，所需糖果是25粒，亦唔太難。但正因為只可以進化一次，所以建議先將伊貝提升至相當高CP值，繼而進化，如此便可輕易得到逾1000 CP的火伊貝。否則進化成火伊貝再提升能力，便需要用到較多的星塵。
8. 大呆獸
大呆獸是小呆獸的進化，進化過程只需一次，需要糖果50粒。唔好睇小呆獸咁呆，但在進化成大呆獸後，是隻實力強勁的精靈，CP值都非常之高，其防禦力甚至達198，在精靈中屬第八高防禦力。而且小呆獸亦時常出沒，上網check 一check 就可以去捉啦!
其實每隻精靈都可以進化成過千CP值的精靈，只要唔好急於在低Level進化，在角色升到較高Level時，隨時在街上捉到CP值過200/300的小精靈，再選擇本身已高CP值的小精靈來進化，就可以進化成過千CP值的精靈。但幾高CP值的小精靈才可以進化到過千的CP值呢? 大家可以到以下網站Check下，咁就可以玩得又抵又得到高CP值的精靈了。(https://pokeassistant.com/main/evolver)
一般認為高CP值就一定有著數，確實CP值愈高，理論上在對戰時會更有利，但其實技能及屬性相尅才是最重要的一環。在打道館時，選擇一隻可尅制對方的精靈，就算CP值較低都會有戰勝的機會。
|
鍾意就快D Share啦！
|
|
|
