無論你著咩衫，你點都唔會變貝克漢。
最近H&M請到兩個大明星幫佢地拍廣告，一個係Kevin Hart，一個係萬人迷貝克漢。先唔講個廣告好唔好笑（其實我冇睇哂），淨係見到咸爺著住一身H&M嘅衣著型味盡現，已經令人有衝動想買返一件。特別係H&M重點賣廣告果件長袖線衫（即係我配圖果件）二百有找，好似搵唔到唔買既理由。當然啦，依個就係H&M最想比到你嘅諗法，佢比咁多錢咸爺著衫都係想靠貝克漢著住件衫吸引消費者搵你地搵錢。其實有個事實大家應該一早知道：無論你著咩衫，你點都唔會變貝克漢。
潮流依樣野係無底洞，你一但迷上，每季換衫嘅錢唔講得少。好多品牌鍾意搵型人名星代言，然後用盡一切方法令你覺得只要你跟住著你就一樣可以變得咁型。其實用腦諗下都會知道咁樣係冇可能，高登以前有張圖將陳冠希同一個街邊阿伯既衣著調轉，結果希哥可以張一件菊花牌底衫著到潮牌一樣。假如有一年又興返著OVERSIZE既滑板LOOK，身高冇米七既可能著完已經見唔到你大脾，到時一樣唔好睇。著衫唔應該睇潮流興唔興，而係睇自己啱唔啱。好似我知道我著唔到大格仔嘅衫，就算格仔每幾年實會興返起都好我都無謂跟風，因為我著左上身唔係潮人，只係一個柒頭。
有一句說話我好鍾意：每一個人都係獨一無二。個個人氣質身高肥瘦有別，自然要襯返唔同打扮。早排女仔好興ABC頭牛仔短褲加對拖鞋，結果出轉街你就以為A&F搞緊員工大遊行。我唔否認有部份咁嘅LOOK係幾好睇，但係一街都係嘅時候，其實大部份人只係做左陪襯，潮味我唔覺，隨波逐流就好明顯。MK小小講句，你要型，起碼夠特別先啦，一眼望過去十個八個著唔多樣嘅，最後咪只係變左平凡。你買H&Ｍ都仲好丫，平嘅一二百，西裝褸都係收你$799，有限錢；你死慳死抵買件Visvim返黎，結果學唔到摩佬做個Special One，到時就真係喊都無謂。
其實我寫依篇文嘅原因係因為我早幾日係H&M門口見到一個著緊件$199線衫嘅男仔企正係貝克漢個廣告面前。係果一刻，我就立即打消左買依一件衫嘅念頭。
FACEBOOK：https://www.facebook.com/MaoYanDe
TUMBLR：http://moyinday.tumblr.com/
|
鍾意就快D Share啦！
|
|
|
