我算是一個乾淨企理的人。屬於我的空間，包括房間、辦公室書桌都被我打理得井井有條。可是，我卻是一個天生不喜歡也不會多做家務的人。我的舊男友Timothy就是那種從小在母親溺愛下成長的男孩，他的媽媽是一個賢妻良母，能妥當地打點各式各樣的家務。於是，我跟Timothy拍拖時，他會有意無意揭示他對我的期望，包括透露他想收到我親手織的毛衣作為聖誕禮物、想在情人節晚上吃到我親手煎的牛扒。然而，我的強項並不在此。我擅長的是寫情信、唱情歌。又或者，我愛他不夠深，所以並不會因為他的三言兩語就去學一些我根本不感興趣的東西。有時候，我真的想衝口而出：「咁不如你去搵個家傭拍拖」恐怕我一輩子也不會應徵家庭主婦這份工。
今天，我和幾個同事到翠華食午飯，當中有男亦有女，有已婚也有單身。我們竟然因為一條西褲而談到家務分工的問題。
「Ivan，你呢條西褲新買架？不過呢，好似有點唔太啱身。」Macy總是喜歡打量和評價男同事的衣著品味。
「唔係呀！其他西褲未熨，咪摷返啲陳年嘢出嚟著囉！」
「嚇？咁你個賓賓搞乜？」
「滿咗約就送咗佢走。老婆近排話返工返到好攰，咪Quit咗份工，留係屋企做家務囉！」的確，Ivan作為一個銀行經理，人工比上不足比下有餘，假如兩口子不大洗，一個人足以擔起一頭家，再養多個BB也不成問題。
「你老婆唔係做家務架咩？咁點解唔熨衫呀？」傳統家庭觀念甚重的Tracy忍不著開口問。
「係囉，咁點解？」我也咬著新出品黑白奶油豬搭訕，搏取一些存在感。
「佢唔想熨，咪我熨囉！不過呢排我病病哋，有啲攰，唔想郁。」Ivan說得輕鬆，我卻聽得出他的語氣帶點唏噓。
也許，Tracy也聽得出他的弦外之音：「咁你而家出緊糧比佢架喎！佢緊係要做好自己本份」
「兩公婆冇所謂」Ivan說。
「哎呀！我寧願返工都唔要做家務。」我斬釘截鐵地說。
「即係咁，我覺得如果兩公婆都要返工，家務都要兩個人一齊分擔。」Macy這句來得中肯。
「所以你老婆而家冇返工就應該要處理好啲家務。」Tracy還是堅守傳統女性的性別定位。
「Macy，咁如果第日你嫁咗，你老公話好攰唔想做家務，你會同佢Bargain嗎？」Ivan問。
「咁我返工唔攰？」我和Macy異口同聲地回應，嚇得隔離檯個大叔也回頭一看。幾秒後，我再補充：「咁咪請工人囉！」
「如果佢養我，我唔介意留係屋企做家務。」Macy爆出一句。
「好喇！咁如果你老公話佢留係屋企做家務，你出去做嘢，你又O唔Okay？咁如果你哋兩個都出去做嘢，你會唔會幫手供樓？」
我爽快地回應了一句「Why not, just be fair」。其實，有哪一個女孩子不想嫁個對自己死心塌地的有錢仔？這樣，女孩可以天天睡至日上三竿、到五星級酒店吃下午茶、逛廣東道名店。可是，我知道這些機會不屬於我的。再低一層次，即使有男子願意養我，但要求我做家庭主婦，我也未必會答應，我不想老公變老闆。我寧可計多幾條數、寫多幾篇文，也不願意窩在家裡邊看《都市閒情》邊切蘿蔔，還得見到李錦聯讚他靚仔。
然而，生活迫人，我並不介意跟另一半AA供樓及生活開支，以及放工後分擔家務，那畢竟是我們共同建立的家，這樣也算是一件甜蜜愉快的事情。現在已是廿一世紀了，男主外女主內這種性別定型的堅持已不合時宜。
我還記得那天，Timothy和我在中環碼頭等上船，我貼著膠片發呆地望著西九那幾幢貴樓。他從後抱著我，然後在我耳邊說：「第時我買嗰度比你住，你就可以唔使返工，日日去買餸煮飯比我食喇！」他看不到那時我的眉頭皺得正緊。我不知道每月只洗剩四千元卻從不相信投資的他何時可以儲夠錢承擔一個新界西北單位的首期，更加訝異他期望我住西九但要天天準時到街市買菜回家做飯。
女孩子，就作好準備跟你的男友一起供樓；男孩子，就作好準備跟你的女友一起做家務。這夠公平吧。
葉希林Facebook專頁：http://www.facebook.com/ashleyip.writer2
|
鍾意就快D Share啦！
|
|
|
