日前麥包被爆因大台內鬥搞到初嘗男主角夢碎，上週四（ 21日）樂易玲親自約見面安撫。
內鬥失男一 樂大媽補鑊五粒鐘氹麥包
在無綫廿九年，月薪至今只有二萬多的麥長青，本來有機會在下月開拍的新劇孭正，不過因權力鬥爭突然被飛出局，雖然事後有樂易玲補鑊，落嘴頭氹足五粒鐘，不過今年約滿無綫的麥包對公司已不存厚望，加上老友陳浩民做盲公竹，力撐他返內地發展，孭住幾層樓的麥包，隨時走人。
黃智賢補上
無綫內鬥白熱化，繼《東張西望》大換血，剷走大部分舊人後，戲劇組亦開始整頓，在無綫捱了接近三十年，終於出頭坐正做男主角的麥長青，突然被通知冇得玩，改由不屬任何馬房的黃智賢補上。
「麥包收到通知好唔開心！樂大媽同佢個頭馬 Cindy（經理人）上個禮拜四（一月二十一日）約咗麥包見面，三個人喺公司 canteen傾咗五粒鐘，不過都好似冇乜用；麥包覺得自己喺公司咁多年，由紅褲仔捱到今日，一直聽教聽話，又叫做有演技，今次件事，令佢心灰意冷。」一名無綫人說。
麥包在內地有市場，登台、商演密密食，近年更一家租住淺水灣。
陳浩民勸走
跟麥包同期出身無綫的陳浩民及樊少皇，因早年返內地發展，已站穩腳密密賺，二人亦異口同聲，撐麥包離巢。
「陳浩民知道麥包唔開心，都勸佢返內地試嚇，無謂留響度再俾人玩。其實麥包早年都有機會返內地拍劇，不過當時仔細老婆嫩，佢唔想丟低頭家走開太耐，而家仔女都十幾歲，識得照顧自己，佢開始心鬱郁。不過嗰日樂大媽係咁氹，又話公司好睇佢，只係角色有調動，所以佢都仲有啲十五十六。」知情者說。
陳浩民與樊少皇早年撤出香港返強國，二人撈得掂，亦雙雙帶挈老友麥包。
麥包同陳浩民多年兄弟，亦是對方仔女的契爺，見老友發展唔順利，陳浩民屢勸他北上搵食。 三度開早班
週日（二十四日）早上九點，在三度低溫下，麥包跟張國強在太子道酒吧為《愛•回家》開早班。對於自己成為權力遊戲下的犧牲品，麥包說心情已平復。
「咁大個人都明白係咩事，冇嘢就呃你嘅。不過我會再努力啲！（陳浩民叫你返大陸發展？）佢搵咗我好多年，啲仔女得五、六歲已經叫我。依家我會考慮嚇，或者拍一、兩部試嚇。」麥長青說。
近年麥包已攀上第二男主角，在劇集《樓奴》戲份不遜於男一王浩信，可惜僅差一步未能升呢。
週日（ 24日）嚴寒上午，麥包與張國強在太子拍《愛•回家》外景，午飯期間二人密密斟，而麥包亦顯得有心事。 走寶
大台無綫的確造就了不少好戲之人，可惜近幾年高層弄權，令不少忠心藝人成為祭品，走得嘅走，例如好戲陳國邦，便公開劈炮！但轉個頭大台又扮矮仔，力邀他回巢做處境劇，不過唔係個個人有此待遇，人治大台，冇譜！
陳國邦
去年十月，好戲的陳國邦在網際網路向無綫發公開信辭職，唔夠三個月，在曾勵珍、毛舜筠以及當權的杜之克力邀下回巢，在新處境劇做男二。
投閒置散的康華，憑約滿前最後一個劇《刀下留人》的萬貴妃被網民激讚，成為該劇亮點，大結局收視更急升至 28點，雖然如此，無綫仍未有對康華作任何挽留。
|
鍾意就快D Share啦！
|
|
|
