是咁的，小弟今日翻屋企，發現間屋有啲唔妥。
首先係見倒走廊盡頭有舊肉色嘅嘢背住我踎喺地下，雖然我無理，但都有少少心寒。
入到屋，我就閂門，而外面就傳嚟「噠噠噠」咁嘅聲，仲有小朋友嘅笑聲。
我望一望個掛牆鐘，成十二點，如果唔係頭先經過走廊嘅時候見倒嗰兩個小朋友打緊桌球波，實以為自己真係撞鬼。
但我間屋，就肯肯定係有啲唔妥。
話說我住喺銅鑼灣某老牌公共屋邨，棟野整好每層有升降機都係近幾年嘅事。以前有啲樓層真係要靠行樓梯上去，比如廿一樓咁，就要上咗十九樓之後行兩層。
由於成棟樓大部分單位都係上一輩嘅人住落，到而家其實好多死得就死，唔死就喺醫院訓緊，所以有唔少空屋。
就算係平日下午翻嚟，成層樓都無乜生氣，頂多係得無線電視播緊宣傳易啲廣告嘅聲。
「23443699，零速傳播。」
一係就聽到六點半新聞報導喺度嘟嘟嘟嘟咁樣。
住多老人家嘅公屋，八點後翻屋企已經無乜人氣，何況我成十二點翻，成個世界好似得翻自己一個咁。
喺呢度，你最好求神拜佛唔好半夜發生咩事要求救。
點解？係因為以前嘅一個故事。
據聞以前呢度住嘅一個居民，有一晚聽到走廊外面有尖叫聲，所以就好奇打開對住走廊嘅氣窗望嚇咩事。
打開之後，就見到有個著紅衫嘅女人發曬狂咁喺走廊跑過，嚇到嗰條友連閂翻個氣窗都唔敢，即刻縮翻入床。
呢件事一傳十，十傳百咁，後來又愈嚟愈多人見到嗰個女人，話佢一路跑一路叫，仲將個頭左右咁fing。
大家幻想嚇伸條脷出嚟奶個芒嘅腦魔BB就知佢點fing法。
半夜見到個紅衫女人一路叫一路fing頭一路跑，都咪話唔恐怖。
後來開氣窗嗰個人就意外死咗，大家都覺得係因為佢望過嗰個紅衫女人。
雖然無人去確認，但普遍嘅居民都認為嗰隻係女鬼。
自此，喺呢度住嘅人就有個潛規則。
夜晚聽到咩聲都好，千祈唔好多管閒事。
我同佢嘅距離大概係五十米，走廊嘅燈光本身就唔係咁夠，所以睇得唔算太清楚。
有時，突然面對一啲無辦法理解嘅異常嗰陣，唯一能夠做嘅就係喺心入面用科學將異常合理化。
啱啱我諗，應該係某一家人罰個仔出嚟走廊之類，咁個細路唔開心，咪踎喺度囉。呢個係最合理嘅解釋。
我合埋眼，任由熱水灑落我嘅身體上面。
咦？唔向左走向右走係呀⋯⋯
「Hi Auntie！！！」我嚇到爆粗，即刻伸手去扭個水制。
沙沙沙⋯⋯
扭熄熱水。
沙沙沙⋯⋯
扭熄凍水。
沙沙沙⋯⋯
「點解閂唔到水喉！」我隨手扔咗個花灑落馬桶，即刻赤裸咁走出廁所，拎條毛巾抹身。
唔係講玩喎，真係血嚟。
我個腦第一時間諗到嘅，係報警。
然後我就知道，面對怪異，報警係無向左走向右走用。
「你好999報案中心。」聽電話嘅係一把好親切嘅女人聲。
「喂！我啱啱沖涼個花灑噴血！呢度應該有人死咗！你地快啲派人嚟。」
「你好999報案中心。」
「喂？聽唔聽到呀？呢度係銅鑼灣例得村，我話可能有人死咗，叫你快啲派人嚟。」
一開頭，我仲以為係對方收得唔清楚，直至我聽到下一句：
「你好999報案中心。」
我嚇到跌咗個電話落地。
冷靜！cut佢線先，用手機再打過。
嘟嘟、嘟嘟、接通。
「你好999報案中心。」
「喂！呢度係銅鑼灣例得村呀，死咗人呀，你地快啲派人嚟呀！」其實我唔係完全確定係咪有人死，只係想吹得大鑊啲，引警察盡快嚟救我。
話筒對面沈默咗一陣，我心入面不停叫：「唔好呀嗱，求嚇你正正常常應我呀⋯⋯」
「喂？聽唔聽到呀？」
「你好999報案中心。」
我發現自己真係好蠢，明明就同頭先嗰把女人聲一樣！根本一聽就要cut線！
而我收線嘅時候就望到手機左上角，好清楚咁顯示係「沒有服務」。
呢一刻，我就知自己真係撞到野。
而惡夢，遠遠未結束。
因為我收唔到線。
我部iphone6自動開咗擴音器：「你好999報案中心。」
我發曬狂咁用手指壓落個紅色收線制度都無反應。如果淨係部手機係咁，我仲可以話比人hack，但連埋花灑噴血又可以點解釋？
「你好999報案中心。」嗰把親切嘅女聲仍然好似錄音咁喺我間屋迴盪。
我終於都忍唔住，iphone無得拆電，咁唯有一野掟出街。
我行出露台掟咗部電話落街，與此同時，我望向廁所，掛入馬桶嘅花灑已經無再噴血，連「沙沙沙」嘅灑水聲都無埋。
我間屋，終於回復平靜。
我用力搖下頭，又捏下自己塊面，真係痛架喎，我唔係發緊夢。
其實無啦啦遇到難以解釋嘅恐怖體驗，係人第一個反應都會以為自己發惡夢。
咁唔係惡夢，要點樣解釋依一切靈異現象？
如果依個係故事，唔駛問都知一定爛尾，因為無合理嘅解釋。
但對人類嚟講，完全解釋唔到嘅神秘感先至最令人心寒。
我曾經喺書入面睇過，令人覺得恐怖嘅要素有三個：
一，恐怖之物唔會死。
二，恐怖之物唔可以擁有溝通能力。
三，恐怖之物一定要係直到最後都唔知係乜嚟嘅野。
諗翻，我啱啱遇到嘅一連串現象，目前完全滿足曬「恐怖原則」，唔怪之得我會嚇到手足無措。
我深呼吸之後，即刻跳上床訓，用張被保護自己。
話說我到底喺邊度惹咗污糟野翻屋企呢？無吖，我都係好正常咁翻工放工姐⋯⋯
我雙手合十，心入面不停求神拜佛，希望啲奇怪現象放過我，同時安慰自己講：「無事嘅無事嘅，訓醒就無事架喇。」
眼皮愈嚟愈重，意識慢慢遠去，就喺依個時候⋯⋯
「你好999報案中心！！！」
一陣女高音宛如暴力咁撕裂半夜嘅寂靜，我手心不停滲出冷汗，掀開張被一望，就見到電視同電腦都自己開咗。
電視一片雪花，電腦都竟然係雪花畫面！？
「放過我好嗎⋯⋯」絕望湧上心頭，我到底仲要受幾耐依啲精神虐待？
下一刻，電視同電腦嘅喇叭一齊發出幾十人混雜嘅叫聲：「你好999報案中心。」、「你好999報案中心。」、「你好999報案中心。」「你好999報案中心。」、「你好999報案中心。」、「你好999報案中心。」
我慘叫一聲，㩒住自己嘅耳仔，跳落床開門衝出走廊。
一出到走廊，我先知自己做咗個好錯嘅決定。
「砰！」屋入面嘅人聲隨住大門自動閂埋而消失。我用力扭個門柄，扭到「咔咔」作響。
我開唔到門，翻唔到入屋。
企喺走廊，成個世界，一粒聲都無，靜到連我背脊啲冷汗滑過皮膚嘅聲音都清晰咁撼動耳膜。
無論係報案中心把女人聲，定我嘅心急呻吟，都比昏暗無光嘅走廊吸收入，遁入虛無。
我扭咗個門鎖幾嚇，發現已經比人反鎖咗之後，無奈咁放棄反抗。
下一瞬間，我覺得自己嘅本能好清晰咁同自己講咗一句嘢。
走，快啲走。
我終於記起，入屋之前，走廊盡頭嗰舊肉色嘅異物。
我驅動好似凍僵咗嘅頭部，汗珠滑過太陽穴。視線轉向走廊盡頭。
|
鍾意就快D Share啦！
|
|
|
