在26日凌晨3時在台北夜店「繽紛年代」消遣遇上槍擊事件的金剛，雖有驚無險，身為「女友」的陳蕊蕊更透過WhapsApp代他回應及報平安，但原來兩人感情早已結束。
據知金剛跟蕊蕊拍拖兩年來，一直不改其喪蒲爛滾性格，令一直視他為結婚對象的蕊蕊相當失望，幾個月前金剛再被蕊蕊踢爆繼續媾女，終令蕊蕊忍無可忍提出分手。
兩年前，蕊蕊跟周秀娜前男友Avis（陳偉成）拍拖，可惜男方勁花心，一腳踏兩船跟蕊蕊室友Yumi（尹蓁晞）撻着，最終分手收場，當時力追蕊蕊的金剛，還在網上力撐蕊蕊狂踩負心Avis，最後成功冧掂蕊蕊，終贏得美人歸。
以往愛蒲爛玩緋聞不少的金剛，最初宣佈跟蕊蕊拍拖後，確實一改以往作風，絕少被影到去蒲，反而經常跟女友甜蜜拍拖，所以拍拖不久便共賦同居。不過乖了一排，金剛又再作反，知情者說：「佢始終死性不改，都係鍾意去玩，佢依家知名度又高，自然有好多女埋身佢又來者不拒，蕊蕊知道當然嬲」
據知，這大半年來金剛在TVB工作不順，工作量不多，得閒得滯更加蒲上癮，因而經常跟蕊蕊吵大鑊，知情者說：「蕊蕊勸佢蒲少啲驚佢出事，佢又唔聽，加上俾蕊蕊發現佢同其他女仔行得好埋，令蕊蕊終於死心。」幾個月前，蕊蕊決定飛甩花心金剛，但因金剛未搵到新居，暫時仍共住大埔村屋，但已分房瞓。
就此事聯絡當事人，身在台灣的金剛至截稿前仍未回覆。而蕊蕊則透過電話回應，聽到「分手」一詞，她停一停才否認，「冇呀！我哋冇分手，總之我哋依家仲係一齊住（有冇嗌過交呢？）嗌交一定有，但係都係為啲小事囉！（佢係咪成日夜蒲溝女？）總之我信任佢（點解今次唔陪佢去台灣嘅？）吓！我有嘢做嘛！（佢今次去台灣傾食肆生意，會唔會投資埋一份？）都有啲興趣嘅。（知唔知佢依家情況點？）仲未聯絡到佢，未知佢協助調查完未，不過我信佢冇份參與。」
但聯絡蕊蕊的經理人漢洋，問到知否蕊蕊甩拖一事，他答得相當妙，「我真係唔知喎！應該冇啩！佢哋仲好似一齊住。（分咗手都可以一齊住㗎啫？）都係㗎！所以我唔知佢哋有冇分手。」
|
鍾意就快D Share啦！
|
|
|
