現代人成日用手提電話，但手機的竊聽技術就日新月異，仲搞到非常之廉價，真係相當得人驚。
昨日1010推出新的加密電話Blackphone，請咗幾個名人來分享有關防止手機俾人竊聽的經驗。
開拍咗三集竊聽風雲的導演莊文強話，佢哋拍戲時要不停做資料
搜集，甚至自己還嘗試去用網上的軟件砌一啲勾線的器材，點知後同事話俾佢聽，自己砌一部就要2000元，但係去深圳華強北路買一部就170幾元人仔，攞番嚟一試，仲可以勾到十條線，認真得人驚。
本網的財經博客陸羽仁亦有出席活動，佢講到同一個政經猛人會面時，那位猛人唔單止要佢將電話放喺會議室之外，仲特備一個金屬的鐵箱，要將電話鎖入鐵箱內，原因係依家的偷聽技術非常之先進，即使你關了電話都無用，電話本身亦可以被遙控成為竊偷器材，關咗機都可以俾人用來竊聽，唯一係將電話的電池拆走，先可以預防得到。問題係依家好多聰明電話，例如iPhone，電池不能拆走，所以部手機本身就係一個竊偷工具。
陸羽仁話佢自己同一家上市公司傾過一個交易，期間個股價即時上升，對方好驚電話被人偷聽，結果雙方都買咗兩張新的太空咭，講到機密嘢，就只能用太空咭電話去講。
Ariel聽完佢哋講，都發覺呢個世界認真恐怖，一係買部保密電話，否則有乜機密嘢，都係唔好用手提電話講啦。
|
鍾意就快D Share啦！
|
|
|
