我做野多年，遇到兩次男同事綁架式追求，感覺非常痛苦
一次，個男同事又肥又矮個樣又幾衰而且有女朋友，但係佢同其他同事打成一片，我估佢可能背後走漏風聲話或特登放話，表示對我有好感，d同事就助紂為虐，隔唔中作勢企圖撮合我同佢，我起初覺得奇怪，點解我同個男人都唔熟，冇咩接觸，但係其他人會想將我同佢送做一對，而且擺明個男人係有女友仲想係辦公室食女既，而呢d同事竟然咁樣，等於做緊壞事。我份人好怕醜，初頭拒絕都冇咁直接，後面唯有同熟d既同事講，千其唔好再傳我地啦，我都唔中意佢既。後面有一次另一個同事又作勢想調戲我同個男同事，我就當住個同事既面講：「我都唔中意佢既，唔好再話我地啦。」之後個同事離職，件事先至結束，我當時置身其中感覺好痛苦，幾乎想離職，覺得呢種綁架式追求好恐怖，係精神上既折磨。對方手段都唔差，企圖輿論造勢，最後弄假成真既機會都好大。但係我覺得個男同事有女朋友仲想係辦公室食女，我都冇咁傻，呢d人肯定唔會考慮架啦，但係輿論綁架對我造成好大騷擾，我又唔夠膽得罪對方，忍左又忍。
另一次，又另一個男同事，係高大靚仔d既，但係都有女朋友，都仲想係office食女，佢都係採取輿論綁架既方式。佢同其他同事講要請我食飯，但係後面其他同事問我佢有冇請我食飯，我話：「並冇，佢可能講笑姐」 所以我仍然唔知佢背後同其他同事點講，因為我好少同佢地來往。總之搞到後尾個個同事都企圖撮合我同佢，仲問我：「佢又靚仔，條件唔錯啊，係唔係？」我話：「係。」但係我都唔中意佢。之後甚至boss都特登想撮合我地，將我同佢安排係一個team，以為我同佢有機會發展。但係boss其實唔會左，因為我覺得個同事雖然係高大靚仔，但係欠缺個人修養，係office成班是非精，我點會中意咁樣既男人，而且又有女朋友，我都唔中意對伴侶唔忠誠既男人，重點係我唔想搵同事做對象，唔想搞office戀情。後面我又同其他同事講左我唔中意佢，唔好再傳我同佢既緋聞啦。d同事就少了提，但係個男同事似乎懷恨在心，成日借d意鬧我，我當時工作狀態的確好差，成日比佢鬧。後面大家覺得奇怪點解佢條件唔差，我點解又會拒絕佢，覺得我不識抬舉。
但係我想講，呢d企圖以輿論綁架逼他人就範既做法，其實令人好反感，簡直係幫兇。後面我終於直白講左我拒絕佢既理由，大家先停止再撮合。但係我拒絕既理由又得罪左唔少人。件事持續左幾年時間
點解有d男人係office仲想食女？而且面對呢種情況又唔好意思太直接鬧對方。往往好委屈，精神飽受折磨，唔知點算，我而家返工都好驚再遇到咁既情況，覺得好痛苦！
大家有冇類似經歷，你地點樣擺脫架？
|
鍾意就快D Share啦！
|
|
|
