5月11日，應老婆要求同外父外母食飯，但適逢毛記細細台台慶，番屋企睇住電視食自然係常識。準時八點正，一路開杏檯食飯，一路說服外父外母一齊睇毛記。對於睇慣無記《波Yeah波羅me》同無記版《我和殭屍有個約會》既老人家，要佢地接受一個新電視台，新興年輕媒體係非常困難既事。不過好好彩，我外父外母都算係容易接受新事物既人，最後都願意給毛記一個機會。
八點半，一開場……估唔到外父反應幾好：「方健儀又估唔到佢都可以幾攪笑喎」「係呀，擺脫左以前主播好嚴肅既形象呀，佢真係挑戰好多新野」正當滿以為可以令兩位老人家好似方健儀一樣，擺脫大大台既時候，一首唔知咩文既歌響起…「唱咩呀？普通話定廣東話呀？D 透氣聲好似俾人急救緊咁既？跳舞又甩哂，咁表演唔得喎」「佢地唔係跳舞唱歌出身，係差少少，不過重點係佢地既歌，帶出好多意思架。」
「呀，條魚都蒸好左，點解個魔術表演仲未完既？」外母突如奇來既問題，令我都嚇左一跳「好緊張呀，真係估佢唔到點變出黎架」正當想轉變話題之際，卓韻芝行左出黎主持《真Dick徵婚了》，我心諗「機會黎喇飛雲，仲唔係高潮黎」：「呢 Part 好笑呀，Dickson 呢條友真係好正」「嘩，呢條女都話自己22歲，唔X係掛，咁我睇落咪似40歲左右？」外母：「無玩啦老野，你都退左休五年。哎呀，不過乜唔係真係行禮既咩？」「咁識左都要試下先既，真係《婚前試愛》咩？」
「丟你奶，呢條肥佬係度up乜呀，都聽唔到佢地講咩，較大聲D 個電視啦」「較大左好多架喇，可能音響問題姐」「嘩，丟那星，唱到咁都學人唱歌，唔X係呀麻？好彩收音差姐」我明白…要佢地同一時間接受毛記同林雪唱歌真係有好高難度，不過我覺得難得佢肯俾機會睇，已經係踏出左一步。
如是者……我地終於捱到去掟壽包環節，當壽包一開始掟，我外父塊面亦已經谷到好似個大壽包一樣，係呢一刻我知道佢要爆喇。「終於做完喇麻？熄機啦好麻。阿女，你地以後真係唔好再叫我睇呢D 垃圾節目」「其實係無資源既情況下，佢地真係好努力架喇…」「機會呢我就俾左佢架喇，冇咁大個頭，就唔好戴咁大頂帽啦，唔係肯拍就有人睇既，都要有D質素先得架」
對比起Fun獎禮，我都覺得今次被比下去……但我唔會怪腦細，因為我知道佢地盡左力。但同時我亦都睇唔通，望唔透，究竟係我外父外母無把握機會轉台？定係毛記無把握呢個令人轉台既機會呢？無人知，但可以相信既係……有唔少孝子賢孫為左向老人家推介而係當晚爭電視，但最後，可能成為左佢地最後一次睇呢個台。
轉載自
http://yes-news.com/51787/-%E8%90%AC%E5%8D%83%E5%91%83like%E8%B3%80%E5%8F%B0%E6%85%B6-%E5%BE%8C%E6%88%91%E5%90%8C%E5%A4%96%E7%88%B6%E5%8F%8D%E5%B7%A6%E9%9D%A2%E2%80%A6
|
鍾意就快D Share啦！
|
|
|
