阿強今日踢波好神勇，因為佢上個星期先追到嘅女朋友Mary，今日嚟咗睇佢踢波。
男人就係一樣好傻豬嘅動物，平時太陽猛小小都話唔想郁。但今日個新女朋友嚟咗睇佢，就好似食咗偉哥咁亂跑亂沖。
阿強身高米七，體重好似成160斤，以前冇女朋友喺度果陣我哋叫佢豬腩強，有時仲會喺佢跑果時，指住佢啲肉叫佢唔好震。不過今日有新女朋友，開波前佢喺群入面要求我哋叫佢做朗尼，因為Mary鍾意曼聯。
阿強頭頂腳踢，差唔多每一個波都用盡全身嘅力氣去追。同埋我發現佢每隔十秒，就會望一望Mary有冇望住佢。
可惜，Mary一直都喺度玩手機……
不過阿強冇放棄，繼續用自己嘅表現去爭取。終於，天有眼，佢執到只死雞射咗入波，跟住佢發現Mary係望住佢，佢即時一個箭步衝過去，做出一個入波嘅慶祝手勢。
其實男人老狗一齊踢下波，入咗波之後慶祝係好低能嘅做法，不過佢啱啱墮入愛河都應該冇樣嘢正常，由佢沉醉下。
佢衝到埋Mary面前，但竟然換嚟Mary一句：
「你走埋嚟做咩？踢完喇？」
「我入波呀……」
當時我距離阿強五個身位左右，但果種尷尬到想窒息嘅氛圍，的確係四方八面咁向阿強沖埋去。
「哈哈哈，我掛住玩手機冇睇到呀。」Mary打圓場，但阿強嘅表情好似好悲傷咁。跟住落嚟嘅比賽時間，阿強已經變到唔再活躍，無曬心機。
離開時，我聽到阿強同Mary嘅對話。
「你又話鍾意睇足球比賽嘅？」
「係呀，我平時睇英超呀。」
真係自取其辱，人哋話鍾意睇英超你就叫人嚟睇你比賽，就算你哋啱啱墮入愛河，個麻醉藥都未至於令到阿強你變成一個英超明星啦，係咪？！
但我明，一個男人可以喺自己女人面前，呈現出最威風最有活力嘅一面，絕對係一種光榮嚟。試諗下，而家嘅男人，一至五甚至六都要返工，星期日分分種有可能要加班，個樣明明唔似只狗都做到只狗咁，難得有一日放假女朋友又肯同埋嚟睇我踢波，就點都想拎返小小男性嘅尊嚴嚟備用
因為當女朋友慢慢變老婆之後，佢就唔會再睇到你踢波。唔好誤會，唔係唔再嚟球場睇，係佢趕不上唔會再俾你去踢波呀！你睇下你身邊啲波友，係咪結咗婚之後開始係球場絕跡？
所以，男人要珍惜自己踢波嘅時間，女人都要珍惜男人仲肯喺你哋面前揮灑自己汗水嚟搏你哋一笑嘅光陰！
下次去球場睇男朋友踢波，俾D面，望多佢兩眼
|
鍾意就快D Share啦！
|
|
|
