黃子華、陳法拉及劉俊謙主演的35場舞台劇《前度》日前開鑼，今次係法拉的處女作，加上男神子華相隔四年再踏舞台，絕對係一飛難求，有錢都未必有得睇！今次子華扮演白手興家的富豪，而法拉係佢曾經的小三。在子華老婆過身後，兩人再度復合，但因為階級同價值觀分歧，不停發生爭拗。法拉過去兩年在美國進修戲劇碩士課程，演技大有進步，一時狂爆粗一時爆喊；而子華則保持一貫水準，連環爆出金句。依家小編就同大家一齊回顧子華神多年來在台上的精闢金句，真係句句都咁到肉！
《前度》改編自英國著名舞台劇《Skylight》，當中加入不少香港本土元素，背景仲變成一間殘舊嘅天台屋。除道盡兩性對愛情的大不同，加入不少香港政治議題、階級觀念及年輕人與上一輩的矛盾等，值得深思！
講男女關係
「上帝創造處女，男人創造婦女。」
「千絲萬縷，唔係執一劑就搞掂。」
「最正嘅感情係兩個人光明正大，毫無保留；亦係最危險，因為你就係得兩個人，要瞓曬身落去先得。」
講兩代矛盾
「年輕人無嘢叻，最叻係否定一切，佢(兒子) 唔係叫我老竇，係叫我腦殘、喪屍，話我乜都唔理，一味只係識搵錢！」
「學生鬧警察多咗，但鬧嚟鬧去都係嗰幾個俾人鬧。」
講階級觀念
「阿輝唔係人，佢係一個司機，而一個司機大部分時間唔係揸車，係等揸車，佢預咗」
講日常生活
法拉表示搭巴士可以睇人生百態，子華反駁︰「如果你同我一樣出身寒微，就知搭巴士冇乜嘢學。」
法拉在劇中完全將女神形象放下，又爆粗又大談「性經」，佢同子華講︰「執多劑？你咁快得喇咩？」之後又鬧爆現時社會輕視教育工作者及社工︰「X街，你哋知唔知社工做緊乜呀？通緊渠呀！掃走一啲你哋喺社會上面扮見唔到嘅嘢呀！」
就算係去到謝幕時，子華有感而發的一番話一樣可以成為金句！佢話︰「今日第一日公演，好多人發達啦，我係講黃牛黨，其實這又何嘗不是悲劇呢？」道盡現時黃牛黨橫行，唔少人以炒黃牛飛致富，令真心想睇的人一係冇得睇，一係就俾勁多錢，認真sad。
子華神演出無數，無論舞台劇、棟篤笑定係拍劇集都一樣金句無數，依家一齊回味！
「搵食啫！犯法呀？我想㗎！」
「錯就要認，要對方認！」
「損人不利己，不如跳井死！」
「大自然所有嘅動物都喺食物鏈上面。鏈嘅下層俾鏈嘅上層吃，一層一層咁鏈上去。」
「我覺得講得出『我好鍾意返工』呢句說話嘅人，一定係鬼上身。」
「香港既精神，就係『冇精神』。」
「阿媽標仔參，邊個畀贖金？」
「而家香港人生仔可以冇老婆，但唔可以冇菲傭。」
「而家香港嘅問題，係所謂嘅婆媳糾紛，係一種必然瀨嘢嘅關係，係咪？除非你個新抱可以喺第一日入門，就全心全意同奶奶講:『奶奶，我愛你!』」
「香港人而家打開報紙打開雜誌，就係睇緊《尋找X街的故事》。如果你起身就係要尋找一個X街，無人唔係X街，你只可以係未X街。但係你一定仆畀我睇。」
「化妝就係你落咗妝，我仲認得你，你落咗妝，我唔認得你，嗰啲叫做喬裝。」
「女人撞衫，仲大件事過撞車。」
「男人係愛情上係要求新鮮，而女人對愛情最大嘅要求就係保鮮。」
「你愛嘅，你得唔到；你唔愛嘅，你甩唔到。」
「一個男人點都會hurt過一兩個女人。但作為一個女人一世都未俾男人hurt過，咁就係真正嘅hurt」
「若要人不知，唔好太低B。」
「唔在乎你有冇俾人姦，只在乎你交唔交到單！」
「比份糧你，一半係比你要嚟做嘢，另一半係比你要嚟受氣嘅。」
「我係一個無雀嘅… 唔係，我係一隻無腳嘅雀仔……」
「世事無絕對，只有無頭緒!」
「I am a man. You are a pen.」
「你食魚翅，我食粉絲；你揸Benz，我坐Bus。」
「一千幾百，猶如垃圾，富貴於我如浮雲… 但係浮雲於我如命根啊。」
「樹要皮，但人… 唔一定要面。」
「你好巴閉咩？我夠有3個C啦，CHEAP、CHEAPER、CHEAPERPER！」
|
鍾意就快D Share啦！
|
|
|
