TVB五虎將過咗30年仲系咁靚仔，系咪食咗防腐劑！老一輩嘅TVB劇迷一定知道當年嘅五虎將（樓主仲後生，只系道聽途說），據聞系當年邵逸夫搞出來嘅一個噱頭，將當時五位新生代演員：劉德華、梁朝偉、苗橋偉、湯鎮業、黃日華並列一齊，打造成電視台嘅明日之星。
之前息影多年嘅湯鎮業復出拍TVB重頭劇《梟雄》，令樓主一直想出一篇關於呢「五虎將」30年過去，有乜嘢唔同嘅文章。
當年嘅「五虎將」個個都是俊朗小生，30年過後，有人仲系咁靚仔，有人就回歸平淡，我們先嚟睇下年齡最大嘅「三哥」苗僑偉啦：
苗僑偉
五個人之中身型最高大嘅「三哥」苗僑偉真系型足咁多年！當年憑《射鵰英雄傳》中嘅楊康一角成功上位，可話系中港台咁多年做呢個角色最深入民心嘅。呢個角色性格極之複雜，俾咗佢好好嘅發揮空間，加上佢扮相英氣，演技老到，瞬間令佢紅遍大江南北，簡直拍得住飾演郭靖嘅黃日華。
多年後出山復出，同依家嘅一班型男，好似林峰、黃宗澤等拍戲，「三哥」一樣唔輸蝕，雖然個樣老咗，但令佢睇起身仲Man，小編身邊廿幾歲嘅女仔都有唔少好霖佢架！
湯鎮業
湯鎮業畢業於1979年無線電視藝員訓練班，出道無幾耐就憑《風雲》、《香城浪子》等出咗名，佢喺《天龍八部》中飾演嘅段譽，系以英俊不凡嘅公子形象走紅。但湯鎮業俾更多人認識，應該系同無線當紅女星翁美玲傳出戀情，之後翁美玲死後，湯鎮業形象大跌，事業行咗下坡路，同無線TV約滿後，曾經去台灣拍劇，1988年回港加入亞視，其間仲拍過三級片，其餘多數都系做下配角。
之後湯鎮業淡出娛樂圈，過去十幾年一直喺內地發展，08年佢再婚娶咗位細佢26歲嘅青島女仔文靜，婚後二人生咗一對雙胞胎女。
五虎之中，湯鎮業算系最「走樣」嘅一個，佢嘅身型一路橫向發展、挺住個大肚腩，外貌身形已經再見唔到當年「段公子」咁英俊瀟灑喇。
黃日華
黃日華應該是「五虎」中最專注於電視圈發展嘅。當年喺《射鵰英雄傳》扮演老實淳品嘅郭靖，令黃日華成為咗家喻戶曉嘅人物。之後佢喺無線多數都系出演古裝劇，好似《天龍八部》中嘅喬峰，《蕭十一郎》中嘅蕭十一郎仲有《雪山飛狐》中命途悲慘嘅一代大俠胡一刀。
樓主覺得佢演技亦爐火純青，做郭靖果陣烚下烚下咁，到做喬峰霸氣十足，喺《馬場大亨》入邊精通馬術又瘋癲嘅李大有簡直無得彈，做《刑警》中人格分裂嘅石東昇亦恰到好處，每個角色都深入民心！
依家黃日華已系半退休狀態，偶爾接拍電影、電視劇，但鍾意踢足球，性格火爆嘅佢仲系會不時因不愉快事件上娛樂新聞。黃日華算系五人之中個樣最唔特出嘅一個，但30年來，佢塊面除咗有歲月嘅痕跡，其佢變化就唔大。
劉德華
男神中嘅男神劉德華有幾巴閉，唔使小編講大家都知喇，當年憑一套《神鵰俠侶》楊過紅遍大中華，至於佢做過最經典嘅角色，我諗超過一半嘅人會投楊過一票，就算到咗依家，和多男神都做過楊過，但劉德華嘅楊過仍然系大眾心目中覺得最深入民心嘅角色。
劉德華系「五虎」中最早行上大銀幕嘅演員，亦系五人之中歌影視三棲發展都非常成功嘅一人（梁朝偉都試過唱歌，亦都紅過一排，但歌唱成就始終不及劉德華）。劉德華出道30幾年，基本上就系紅足30幾年，佢都算系香港演藝圈嘅一個奇蹟。
佢依家已經結咗婚有咗女，30幾年前後對比，只覺得佢多咗男人味，身型仲系咁標準，無論做乜嘢都好有型，就算做乞丐，相信都系史上最靚仔嘅乞丐喇！
梁朝偉
梁朝偉一開始主持兒童節目《430太空梭》，但好快就有第一部正式演出嘅劇集《香城浪子》，並開始受到矚目。《鹿鼎記》中韋小寶一角令佢一片成名。隨後《新紮師兄》同《絕代雙驕》等電視連續劇令佢名氣繼續上升。
梁朝偉同劉德華一樣，都系和快就跳上大銀幕，而且演技可話系不斷進步，同王家衛嘅合作更正式確立咗佢嘅演技風格，登上演藝高峰，中外幾乎所有犀利嘅電影獎都俾佢攞過。
樓主覺得梁朝偉系個樣變化最多嘅人，唔系話佢由靚仔變老，而系話佢果種感覺，開始喺TVB果陣，佢俾人一種好陽光嘅感覺，之後面上多了一種憂鬱，一對電眼亦隨住唔同時候有唔同變化，慢慢好似覺得佢個樣都變埋，大家有無同感啊？
|
鍾意就快D Share啦！
|
|
|
