五個月 掃兩樓 麥長青 麥包 逆市 充充充 買 工廈 壹周刊 1350期
前年炒燶iPhone搞到俾「財仔」追數的麥包，無懼加息冧市，五個月內買完樓再買工廈。
五個月掃兩樓 麥包麥長青逆市充充充買工廈
在無綫收入有限的麥長青（麥包），一直靠投資生意幫補一家四口生計。試過炒 iPhone賺過錢的他，前年食過翻尋味，借財仔炒 iPhone 6，結果蝕入肉，搞到被追數七百幾萬。
過去一年，麥包向身邊親友左度右度，又狂跑夜場騷撲水填氹。見過鬼唔怕黑，就算樓市唔穩定，麥包依然冇有怕！近月連環入市，先後買入一個紅磡單位和一個荃灣工廈，市值共 1,272萬。
還清舊債
大手炒 iPhone坐艇被「財仔」追數，加上聽從風水師意見，搬去月租七萬的淺水灣風水屋，麥包麥長青百上加斤，搞到要開口向身邊親友「度水」，又向內地中介人預支騷錢應急，先清「財仔」，再慢慢填氹還街數。
「好彩個內地中介人夠義氣，肯一次過預支廿場騷錢俾麥包應急，佢收二萬五人仔一場，嗰陣人民幣高水，兌番港紙有成六十萬；再問埋身邊啲朋友親戚借錢，先找清財仔條數，朋友嗰啲再慢慢攤長嚟還；聽過佢仲攞咗層樓去加按，而家總算搞掂曬啲街數。」麥包身邊人透露。
無綫份糧得兩萬幾，要養活一家四口的麥包，根本入不敷支。
10年憑《巾幗梟雄》中「非凡哥」一角奪得台慶「最佳男配角」，令麥包對風水師苗師父更加言聽計從。
向內地中介人預支廿場騷錢應急的麥包，近年密密返內地還騷債。 買樓收租
還清舊數後，麥包又搞到自己一身樓債！過去半年，政府辣招加上加息壓力，樓市持續唔穩定，麥包見樓價下調，勇猛出擊。
去年九月，麥包以 426萬買入被稱「劏房之城」的紅磡環海•東岸一個 310呎一房單位，同老婆聯名持有，仲按足九成五，月供約兩萬。
未夠籌！數月後，再斥資 846萬，購入荃灣工業大廈天台千呎單位。
「紅磡層樓做咗二按，按足九成五，供廿年每個月供兩萬蚊左右，麥包話買嚟送俾老婆收租。仲有幾年前買入嗰個鰂魚涌單位，之前因為要還錢俾親朋戚友，佢哋攞咗間屋加按又要供一年，加埋荃灣個工廈單位，每個月淨係供磚頭，麥包都使超過七萬，嚟緊加息，仲大鑊！」麥包身邊人說。
十個樽九個蓋，麥包充充充！
麥包買入位於紅磡、有「劏房之城」之稱的環海•東岸，成交價 426萬。
有傳麥包炒 iPhone預埋契妹陳茵媺，最終齊齊坐艇。
去年十二月，再入市，以 846萬買入荃灣工廠大廈天台全層，單位用公司名義持有。
|
鍾意就快D Share啦！
|
|
|
