宮崎駿睽違十年復出之作《你想活出怎樣的人生》將於7月14日在日本正式上映，但到目前為止都冇公開任何劇照或預告片。電影製作人鈴木敏夫日前受訪時就表示，希望今次「零宣傳」策略能令觀眾更加期待。 | |
繼2013年《風起了》後，日本動畫大師宮崎駿事隔10年再出長篇動畫《你想活出怎樣的人生》，考慮到佢老人家已經80多歲，今次好有可能真係「封鏡之作」，然而一部咁重要嘅作品，吉卜力卻沒有作出任何盛大宣傳，除咗去年12月曝光一張手繪海報之外，到目前為止都冇公開任何劇照、預告片、劇情大綱以及聲優陣容，只知道電影靈感源自小說家吉野源三郎1937年同名作品，但電影故事係完全原創，非改編作品。令人不禁聯想起《男兒當入樽》劇場版動畫《THE FIRST SLAM DUNK》嘅宣傳策略。 | |
最近吉卜力三巨頭之一嘅鈴木敏夫接受《文藝春秋》訪問時透露，佢哋係特意採用「零宣傳」策略，認為保持神秘能令觀眾更加期待，所以冇預告片、冇電視或報紙廣告，只係得一張海報就直接上映。與此同時，鈴木敏夫亦以荷里活大片慣用行銷手法對比《你想活出怎樣的人生》：「有一部美國電影...啊，我差啲講埋個名出嚟添！同樣喺今年夏天上映，所以佢哋分別製作咗三條預告片相繼發布，如果你睇晒三條預告，你就會知道套戲講緊乜。咁觀眾會有咩諗法呢？肯定有人睇完所有預告片就決定唔入場睇正片，所以我想做相反嘅事情。」大家又覺得吉卜力今次嘅宣傳策略有冇你更想去睇《你想活出怎樣的人生》呢？ | |
 | |
日本作家吉野源三郎1937年出版小說《你想活出怎樣的人生》，講述父親離世、出身自小康之家嘅15歲中學生「哥伯尼」喺舅父嘅引導下探索友情、貧富、欺凌、勇氣等課題，從而帶出「人之所以為人的價值」以及「生而為人應有的態度」，被譽為兒童文學教育經典，曾於2017改編成漫畫。 | |
| 資料來源：THR | |
本文作轉載及備份之用 來源 source: http://menclub.hk
|
鍾意就快D Share啦！
|
|
|
