查看相片
喺無綫劇集《一屋老友記》入面飾演細寶嘅張彥博，劇中雖然只係配角兼生面口，不過就搶鏡度十足！佢喺劇入面讀完大學後乜都唔願做，淨係搞下音樂又唔正正經經打工，激死屋企人。喺劇集入面做到入型入格，令大家都以為佢真係好後生，不過其實原來佢過埋今年生日就36歲架喇！而家好多藝人都好似食咗防腐劑咁，個個都變童顏。今日同大家數下仲有咩藝人都係keep得咁好
查看相片
蔡卓妍（阿Sa）
2001年憑住青春無敵出道嘅阿Sa拍著阿嬌成為女子組合Twins，雖然以前經常被人批評，不過無阻其演藝事業發展。雖然而家33歲，喺呢出道十幾年嚟經歷結婚、離婚、拍拖、分手，不過樣貌依然同當年嘅學生妹look無分別，只不過多咗一份女人味。
查看相片
鍾欣潼（阿嬌）
有阿Sa當然就有阿嬌同樣年過30嘅佢出名有啲Baby Fat，不過35歲嚟講皮膚樣貌各方面都保養得十分好，到而家拍戲都仲可以扮學生。
查看相片
周慧敏
一向俾人話食防腐劑大嘅周慧敏雖然而家已經少咗幕前演出，48歲嘅佢到而家仍然都維持到玉女形象，同90年代嘅佢一啲分別都無。倪震真係執到
查看相片
孫慧雪
今個月就34歲嘅宅男女神孫慧雪，向來深受網民愛戴，淨係睇樣真係估佢唔到已經年過30。好似係啱啱播完嘅《純熟意外》，阿雪劇中飾演楊言愛，係殷然（蔡思貝飾演）嘅好朋友，望落去真係同25歲嘅蔡思貝差唔多。最近，佢仲趁住入行10周年推出處女寫真集添呀，相信到時應該會有好多巴打支持阿雪㗎
查看相片
邵美琪
今年51歲嘅邵美琪喺正在播出嘅《完美叛侶》入面狀態大勇，演技仍然細膩之外，最令人驚奇嘅就係佢「逆生長」嘅外貌。好多網友都大讚佢keep得好，扮三十幾歲嘅少婦仍然十分有說服力。
查看相片
張智霖
童顏並唔係女士嘅專利，就好似44歲嘅張智霖咁。佢同台灣嘅林志穎、日本嘅福山雅治齊齊被網民封為童顏三寶。雖然佢之前喺國際電影節被司儀讚佢同廿年前一樣，佢自己就話其實自己知自己漸漸變老，只不過外人未必睇得出，仲話自己係天然無添加。天然無添加都仲Keep到咁？Botox以後無定企
查看相片
曹永廉
51歲嘅曹永廉自從拍咗《公公出宮》後就被網民話佢逆齡生長，扮娘娘腔嘅太監「細雞」扮到入型入格，深得觀眾喜愛。不過俾人讚佢童顏成功吸睛時，佢就話：「我個樣還可以，但副偈唔得，不過化粧都好重要！」
|
鍾意就快D Share啦！
|
|
|
