我有一個親身經驗發生晌屋企，個時我同條女租左馬鞍山耀安村耀和樓一個單位住(人地買左可以放租)。
初初搬入去頭幾個月都無野，之後好多時朝早訓醒我地對拖鞋都會出左廳度(唔齊整咁晌地下)，我初頭以為條女夜晚去廁所唔覺意踢左出去就無理啦，點知過左幾個月之後，有一朝我一行出廳，見到我對拖鞋放左上電腦椅度(係齊整個隻)!!我屌佢老母嚇撚到鳩縮，即刻放番落黎扮無事，條女起身見我面都青埋問我做乜，咁我費事佢驚咪話訓唔夠算，之後我就不意為意諗住無乜野就算啦~~
跟住過一排之後，有一晚條女ot要收好夜，咁10點零鐘得我一個玩緊電腦，我個時係背住廚房坐的，突然聽到廚房個摺門有郁動既聲，咁我拎轉頭望下，見到度摺門慢慢咁關左一半，我心諗: 唔係咁猛呀!!??!
屌鳩佢一諗完呢句度門就"彭"一聲關埋左!! 仆街駛唔駛玩到咁大呀!!??!
之後我猶豫左一陣究竟點算好....再諗諗下唔係辦法，
就一野衝過去"彭"一聲開番佢再向住廚房講: 玩撚完未??!我地租個地方住下咋!!入黎又有拜神同做足曬禮節，有咩得罪你呀??你有要求就一係一次過講曬或者表示曬出黎!!!唔好晌度攪攪震!!!，之後成間屋靜曬~~跟住就無再發生過~~~
不過，以下呢個就真係我到而家諗番起都好撚驚.....
我女朋友本身頭髮到頸位咁上下，咁佢成日都甩好多頭髮~~咁好自然就要成日掃地，而佢間唔中就會發現到地下有1-2條(有時幾條)長到落背脊既頭髮晌度，佢就問我係咪有朋友上過黎，咁我話無，佢就不意為意咁無再理，但我就不段都留意緊呢樣野，不過都係頭髮啫~~唔死得人掛~~
而我自己本身有個習慣唔鐘意晌屋企著衫，就算冬天我情願披住張薄被都唔會著衫，而有時我玩電腦會玩到好夜，但每當我玩親電腦個時，背脊位呀，膊頭位呀都會好鬼痕，痕到要不停抓，我一向都認為自己火重或者皮膚敏感先係咁，所以一直都無理過~~~
直到有一次，我打打下機，條女突然晌我後面攬上黎哄塊面落我塊面度好恩愛咁問我野，而佢啲髮尾岩岩晌我膊頭位，我先知，原來我一直以黎，膊頭同背脊既痕癢都係因為俾啲頭髮hihi下而形成，但係，我夜晚玩電腦時係得我一個，條女係訓緊的，咁係邊個晌我後面哄埋黎，呢點我就唔敢再諗..........，呢間屋，我地大約住左2年就搬走左lu.
轉帖 by Bathsheba@www.discuss.com.hk
via：http://www.discuss.com.hk/viewthread.php?tid=26293243
|
鍾意就快D Share啦！
|
|
|
