早前我哋曾為大家報導，Ridley Scott認為自己已經拍得夠多《Alien》系列，所以希望將系列交畀其他導演發展。不過近日佢接受英國《Guardian》訪問時，口風就稍為變軟，至少仍有執導《Alien》前傳第三部嘅可能性。另一方面，同一個訪問中佢亦透露自己差啲以2000萬美金片酬接拍《Terminator 3》，但最後就因為驚自己拍唔掂所以放棄。 | |
話說《Guardian》收集咗網民五花八門嘅提問，並搵Ridley Scott親自解答。當中佢既有提到當年《Blade Runner》上映時佢被《New Yorker》著名影評人Pauline Kael狠批，後來佢將呢份影評裱起掛喺辦公室，久唔久仲會對住佢鬧「Pauline X你」；又有提到近年接受訪問時好鍾意講粗口嘅原因等。 而當中就有人問道：「會唔會有《Alien》前傳第三部或者《Gladiator 3》」。對此Ridley Scott嘅回答非常簡潔有力：「《Gladiator》依家籌備緊，至於再拍一套《Alien》呢…好呀，諗到我就拍囉。」 雖然呢個答案聽落非常敷衍，但比起6月時嘅訪問直言「我覺得我拍夠」都算係有所軟化，對於期待緊繼《Prometheus》及《Alien: Covenant》第三部「異形前傳」嘅Fans黎講，都算係好消息嘅。 | |
 | |
訪問中嘅另一亮點，就係有人問：「你係咪真係曾經打算拍《Terminator 3》？」Ridley Scott就回答道：「呢單嘢我好自豪呀，因為我拒絕咗2000萬美金——我係唔可以被錢收買架！當時有人同我講，『你去問下阿諾·舒華辛力加收幾錢』，於是我去同片商講：『我要收同阿諾一樣嘅片酬』，點知對方真係肯喎！」 「我心諗仆街啦，因為我拍唔到架，我拍唔到呢啲戲。即係好似占士邦電影咁，佢嘅精髓係有趣同誇張；而《Terminator》就係純粹嘅漫畫，但我想將佢拍得好真實。所以從來都無人搵我拍占士邦，因為我好可能會搞出事。」 | |
資料來源：Guardian | |
|
鍾意就快D Share啦！
|
|
|
