同女朋友諗緊食乜嘅時候，佢好唏噓咁講：「唔知我下個男朋友會唔會好似你咁，成日帶我周圍去食嘢呢？」
佢唔係打算同我分手，我哋嗰刻仍然十指緊扣。
佢只係想同我玩一個「幻想下一個男/女朋友會點」嘅遊戲。
佢：「你一定會揀個靚我好多㗎」
我：「我會揀個唔會咁大頭蝦嘅！成日唔見嘢，又行錯路！」
佢：「咁我都會揀個唔鐘意打機嘅！」
我：「少女，你太年輕了，有男仔唔鐘意打機？」
我哋講返啲平時鬧交嘅禁忌話題，但全程抽水mode咁笑住講，唔係一講起就扯火⋯⋯
佢：「你呀！要同第時個女朋友Gentlemen啲，乜嘢都要主動幫佢！」
我：「妳記得唔好咁依賴你第時個男友喇！唔係個個好似我咁唔嫌妳煩㗎。」
佢：「你要諗多啲話題講，成日deadair會悶親女朋友㗎！」
我：「咁妳要發少啲脾氣，少少事就體諒下個男仔，返工真係好辛苦㗎⋯⋯」
呢排我工作比較忙碌，好多時約佢都遲咗兩、三個鐘，令佢好唔開心，佢覺得我冇交帶，我解釋話我真係忙到一秒講個電話都行唔開，為住呢件事，我哋都鬧過幾次交。
我：「哎，行咁耐都冇嘢好食嘅！」
佢：「你又唔一早Search定！」
我：「唔知我下個女友煮嘢有冇妳咁好食？」
佢：「你平時唔係話食嚟食去都係嗰啲好悶咩？」
我：「係悶㗎，但我鐘意食！」
佢：「可能其他人煮得仲好食呢！」
呢排拍拖已經好少出街食，一來食嚟食去都係嗰啲，二來女朋友話由佢發揮，每次佢用好平嘅價錢，煮到好味過出面嘅餐廳，就會好有滿足感。
呢個時候，我都忍唔住要爆喇。
我：「你記得唔好再成日買嘢畀你男朋友呀！自己儲下錢知唔知！仲有呀，唔好等佢覆Message等到唔瞓覺，佢唔應妳，咪唔應佢囉！最緊要最緊要！如果⋯唔⋯佢唔話同你結婚，唔好蝕底畀佢呀！」
佢：「哈哈，原來你已經變咗我老竇，你都知你自己做嘅嘢唔啱呢？」
然後，輪到佢爆Seed。
佢：「你都唔好下下就曬女朋友，明明自己唔鐘意食都陪佢食、唔鐘意睇嘅戲就唔好陪佢睇，做男人有返啲霸氣！如果唔係佢就食住上㗎喇！」
講到我哋好似真係要分手咁，但呢個只係我哋同對方表達內心感受嘅方式。
我：「行咁耐都冇嘢食嘅，講到下下下下下下個女友都未食到飯喇⋯⋯」
佢：「咁不如⋯？」
我：「好呀！」
唔使講喇，返屋企煮飯食啦。
我哋繼續十指緊扣，分手？鬆少少都唔得呀！
|
鍾意就快D Share啦！
|
|
|
