於Barbara Broccoli兄妹二人交出主導權後，Amazon MGM於六月時就宣佈下一部《007》電影將由目前忙緊《Dune》第三集嘅Denis Villeneuve執導。而據報近日Denis Villeneuve終於開始尋找新一代占士邦，不過出乎之前預計嘅係，佢似乎打算搵年輕新臉孔黎出演，換言之過去傳聞中絕大部份嘅人選都被排除。 | |
上一代占士邦 Daniel Craig 圖片：《No Time To Die》 | |
據《Deadline》報導，明年Denis Villeneuve完成《Dune》第三集之後就會開始籌備新《007》電影，當中最重要一環當然係搵占士邦嘅演員人選。據知情人士透露，Denis Villeneuve及編劇Steven Knight心見中嘅理想人選係搵一個「廿尾到三十頭」、「無人識」嘅新臉孔演員，去重演原著小說中嘅「鈍器」特質——即係「致命但沉悶，對身邊發生的事不感興趣」嘅人。同時佢哋亦希望搵一個來自英國嘅男演員，以保留占士邦係英國人嘅傳統。不過就唔排除可能會搵非白人黎飾演。 上述要求基本上就排除哂過去傳聞中所有大熱人選，例如Tom Hardy、Idris Elba、Henry Cavill，以至Timothée Chalamet等都因為年齡、國藉等問題被排除。事實上考慮到要「新臉孔」，咁大家講得出嘅演員應該都唔符合要求。 | |
史上最年輕嘅占士邦演員係當年29歲嘅George Lazenby  圖片：IMDB | |
你可能會奇怪點解Denis Villeneuve及Steven Knight會有呢個演員選擇，甚至會覺得上面提到嘅「鈍器」特質同大家印象中嘅占士邦一啲都唔似。但據知情人士指出，Steven Knight係從Ian Fleming早期創作嘅占士邦小說中搵靈感，換言之新電影嘅劇情好可能係一個「重啟」，由占士邦由皇家海軍被MI6招募嘅過程，又或者係招募後嘅早期任務講起，照咁睇搵個年輕演員、氣質同大家熟悉嘅「靚佬」有所差異，似乎又非常合理。 | |
資料來源：Deadline | |
|
鍾意就快D Share啦！
|
|
|
