Disney最新真人版電影《Snow White》（白雪公主）於上週正式上映。縱然電影不論拍攝、宣傳、戲裏、戲外都充滿爭議性，但外媒仍然估計會成為近來票房最亮眼嘅電影。甚至有人估計《Snow White》嘅全球開畫票房可以到達一億美金。不過從目前公佈嘅優先場票房黎睇，想衝擊一億票房大關似乎仲有啲距離。 | |
上週於電影上映之前，有外媒推測《Snow White》嘅首週（上星期五到星期日）美國本土票房可望達到4,500至5,500萬美金。若果與過去其他Diseny真人版電影相比，則大約坐落於2019年嘅《Dumbo》（小飛象，北美開畫票房約4,600萬）以及由Lily James主演嘅2015年《Cinderella》（仙履奇緣，北美開畫票房約6,800萬）之間。 甚至有人樂觀地認為，《Snow White》嘅全球開畫票房有可能衝破一億。事關有票房消息人士指出，留意到各個年齡層、家庭狀況嘅女性都對《Snow White》有「堅定到強」嘅注意及興趣，加上同期並冇其他同規模嘅大作上映，換言之絕大部份場次都係播緊《Snow White》。兩者均對電影票房有正面影響。 | |
 | |
但「全球開畫一億」呢個估計似乎真係太過樂觀。到撰文之時，唯一能夠掌握到嘅票房數字就係上週四一日嘅「優先場票房」。據《The Hollywood Reporter》報導，《Snow White》嘅優先場票房為350萬美金，比起上面提過嘅《Dumbo》（280萬美金）及《Cinderella》（230萬美金）仲要多。而近來優先場票房差唔多嘅同類電影，就有去年上映嘅《Kung Fu Panda 4》，優先場票房為380萬美金，最終北美開畫票房為5,800萬、全球開畫票房為8,100萬。換言之如無意外，《Snow White》嘅票房應該都係咁上下。 問題係《Snow White》呢部電影就係「充滿意外」。所以Rachel Zegler嘅發言、小矮人嘅設計等爭議點究竟係會拖累票房、定係「炎上行銷」成功，就要到下個星期票房數字出爐先知道啦。 | |
|
鍾意就快D Share啦！
|
