日本偶像團體AKB48曾經紅極一時，就算遠在香港、就算你根本冇聽過佢哋啲歌、睇過佢哋表演，你都總會講得出幾個成員名。不過近年AKB嘅人氣大幅消減，除咗缺乏代表性成員之外，更多嘅係成員畢業、退團嘅新聞。而日本文化研究者「松谷創一郎」日前就於媒體上撰文，指出AKB面對疫情及K-POP興起，不論成員人數定唱片銷量都大跳超過六成，已經去到「危急存亡之秋」。 | |
據松谷創一郎指出，AKB48於2005年12月創立，但去到2009年CD銷售量先首次突破10萬張，而隨後嘅第14隻大碟《River》登上銷量榜首，以及2010年推出嘅《ヘビーローテーション》大熱，終於將團體推上頂峰。當時日本音樂正處於「停滯．混亂期」，AKB將握手會等福利綑綁於CD之中，令CD銷量暴升；同時因為當時Oricon等日本榜單只計算CD銷售量，所以AKB就合法地「刷榜」，將自身影響力擴大。 但2010年中期，日本各大榜單加入串流播放等數據後，AKB嘅「合法刷榜」方法不再適用。而人氣成員如指原莉乃（卒業）、宮脇咲良（先去韓國參加《Produce 48》，再以IZ*ONE出道，然後又以韓團LE SSERAFIM第三次出道）等先後離隊、新冠疫情等亦大幅削減AKB嘅人氣。而且因為疫情期間無法舉行握手會，連帶CD都暫停推出，結果人氣進一步下跌，2020年甚至被剔出此前連續參加11年嘅《紅白歌唱大賽》。數據指出2020年3月時AKB嘅單曲首週銷量達117萬，但疫情過後就僅餘三份一，即35萬左右；如果用2023年單曲年度銷量，同AKB全盛期2018年時相比，更係大跌87.3%（69.5萬 vs 543.1萬）。 | |
AKB歷年銷量  AKB歷年成員人數 
| |
團體人氣下跌，結果令現有成員紛紛出走、同時又吸引唔到新成員加入。AKB於2014年5月迎來人數高峰，當時整團共有139人之多；到2021年1月時仍有99人。但到目前一刻，團體僅剩34人，當中仲有9個係已經宣佈卒業，只係未正式離隊。團體去年4月宣佈廢除創團以來嘅隊伍編制，相信亦係因為隊中人數已經少到無法維持分隊。 同時AKB、又或整個日本偶像界都面臨K-POP競爭。除咗如前文提到嘅宮脇咲良去到韓國再出道外，有潛力嘅年輕少女亦更傾向選擇去韓國當練習生，甚至有韓國經理人公司JYP與日本Sony合力推出，成員全為日本人，但歌曲舞蹈風格均隨K-POP嘅「NiziU」等團體。而K-POP除咗「爭人」之外，其以歌曲、舞蹈為主嘅風格，亦將過去一直「偶像行先，歌曲行後」嘅AKB等日團比下去， | |
宮脇咲良（左一）以韓國女團LE SSERAFIM第三次出道。順帶一提，成員Kazuha（右二）亦係日本人 
UNLAME 
| |
有見及此，AKB48去年推出《OUT OF 48》節目，希望從成員及素人中選中歌唱及舞蹈都有實力嘅成員，節目結束後組成新女團「UNLAME」。不過組合推出後，由出道曲《I AM I》及造型都被指抄襲韓國女團「IVE」。 松谷創一郎指出，AKB嘅成功可視為從「音樂性」轉向「偶像服務」嘅改變，但K-POP嘅出現又將潮流逆轉，比起「愛嬌（可愛）的偶像」，依家大眾更鍾意「好好做音樂的偶像」。 | |
資料來源：Yahoo News |
|
鍾意就快D Share啦！
|
|
|
