2020年12月9日星期三

「有片」阿姨我不想努力丨...

大膽創新廣告唔係個個老闆同客戶都Buy，不過搵開明星做代言人嘅日本杯麵品牌，最近就棄用藝人宣傳新出嘅杯麵，反而抽近期大熱嘅「跳舞群組」水，搵咗個大隻仔同睇落似40+嘅姨姨邊跳舞邊sell新產品，廣告出街之後引嚟網民激烈討論，唔少人仲讚廣告商大膽創新，夠薑拍攝兼推出這個廣告。

以往廣告商都傾向搵明星、藝人做宣傳，貪他們可以帶起明星效應，令產品獲得更多人關注及購買。不過隨時KOL、YouTuber等彈起，近年廣告商找代言人的準則亦有所改變。

廣告向來創新的日本知名杯麵品牌，過往曾找Twins、謝霆鋒、古巨基等明星做宣傳，但隨着時代轉變，近年此品牌轉為以動漫角色及KOL等宣傳及拍攝廣告。他們最新推出的廣告更反傳統，以廣告商都會避之則吉的時事熱話作題材來拍攝廣告。昨日他們在FB專頁中，上載了一條疑似以「跳舞群組」作題材的33秒廣告片，當中一位睇落似40+的姨姨，與一名上身只穿圍裙、頸戴煲呔的大隻仔跳貼身舞，姨姨在他旁跳了數秒後，大隻仔即將一隻拮住蘑菇的叉，遞到自己胸前餵食姨姨，一臉滿足的她食完粒蘑菇之後繼續於大隻仔身旁跳舞。鏡頭一轉，今次大隻仔就將捲有麵條嘅叉，遞到自己腋下前方，畀同樣跳舞跳得好開心嘅姨姨食，同樣地40路姨姨都係好滿足咁食咗啲麵。

睇到呢度，已經有唔少網民留言話個廣告好重口味，留言表示：「重口味宣傳」、「非一般勇氣」、「我應該會有一排唔會再食合味道杯麵」，但亦有唔少網民大讚客戶夠開通：「個客咁敢玩，真係值得頒個獎比佢」、「你哋老闆咁開通嘅，夠膽玩，正呀！」、「我特登嚟畀like客戶，good client!」、「個idea係咪來自跳老舞群組？如果係，咁成個production又幾快喎。」、「邊度有得賣，我要un住食。」