黃秋生跟女助手傳緋聞多年，上週二人更孖住睇情趣用品。
黃秋生帶女行性商店
54歲黃秋生，跟老婆結婚 23年，大仔都已經 19歲，不過兩人卻分開生活，一向無王管的他，就算緋聞女友如走馬燈，但身邊出雙入對的女助手，多年不變！二人甚至一齊去性商店睇情趣用品，關係密不可分。
分開住關係好
做完影帝做視帝的黃秋生，被傳內地封殺後，近年亦主力做舞台劇，加埋開班教戲，專心賺港幣。
平日意見多多的黃秋生，婚姻生活亦有別於一般人。跟老婆吳惠貞九二年結婚後，兩人以各有自己空間為由，分開生活，即使屢傳婚變，仍我行我素。
「秋生好少講佢老婆，但以前佢講過同老婆都係火爆性格，一齊生活好多磨擦，分開住之後，各自有自己生活圈子，空間大咗，反而互相包容，其實佢哋關係好好！」知情者說。
同過不少女星傳緋聞的黃秋生，近年同隨他多年的金毛女助手，關係更密不可分。多年來出雙入對，無論公事私事，女助手總在左右。
「秋生個助手以前喺有線做幕後，跟咗秋生之後，話就話係助手，不過其實同女友冇分別！秋生對佢好細心，佢哋亦唔會好避忌，無論去邊都行孖咇！」
位於擺花街的情趣商店。
黃秋生與女助手睇情趣用品睇到手指指，之後一齊入內。 食飽睇情趣用品
上週二（一月二十六日）下午，黃秋生與女助手在中環威靈頓街搵地方醫肚，左揀右揀，最後去了擺花街的「羅富記」食粥麵，坐低食了半小時，之後一齊行去附近的性商店睇情趣用品。二人關係非比尋常，可想而知。
同女助手出雙入對的黃秋生，曾被拍得一齊行書店。
去年幫無綫拍台慶劇《梟雄》，黃秋生即刻做埋視帝。
大仔黃睿名早前在美國遇車禍，黃秋生冇簽證又撞正做舞台劇，要靠老婆飛去當地，睇實個仔。
雖然分開住，但黃秋生與老婆吳惠貞關係良好。 風流史
92年與太太吳惠貞拉埋天窗，婚後育有兩子的黃秋生，多年來身邊不乏異性，與圈中女星緋聞，更一單接一單。
施綺蓮
98年，拍攝電影《香蕉成熟時》傳二人拍拖，其後更不避嫌結伴看首映，態度親暱，更一度被拍到孖住夜蒲狂歡。
黃卓玲
00年，合作電影《走投有路》撻著，被拍到深夜密會，黃秋生為護花一怒之下向記者動粗，事件驚動警方。
張詩敏
07年，黃秋生被踢爆與廿四歲女模張詩敏孖住睇拳賽共遊台北，就算明知有記者在場，二人亦不避忌又攬又抱，事件一度令黃秋生鬧婚變。
范冰冰
07年，與范冰冰合作內地劇《寄生人》戲假情真，傳出緋聞，有工作人員目睹女方挨住秋生，又為對方按摩，之後又來港快閃當年中環的麗嘉酒店，態度親暱。
陳雅倫
08年，與艷星陳雅倫合作電影《硬漢》時被拍到親密外遊，又孖住一齊返酒店，其後女方極力否認關係。
呂慧儀
09年，黃秋生於電影《 Laughing Gor之變節》擔正男主角，更一早向監製欽點呂慧儀做戲中女友，有傳呂慧儀曾在片場坐黃秋生大髀為對方修甲，二人關係曖昧。
|
鍾意就快D Share啦！
|
|
|
