老港正傳 喬寶寶講故：我喺廟街大！
「你老 X，呢度係印度吖！」
點解人爆粗，佢爆粗，喬寶寶同阿叔爆起粗上嚟特別好笑、特別啱聽?
因為呢個印度人夠地道囉!就係咁簡單。
其實爆句粗又有幾難?喬寶寶識嘅粗口同俚語分分鐘多過你同我。
膚色係黑啲，毛係生得多啲，不過膚色和攣毛底下收埋係個土生土長嘅老香港......唔係一代，而係三代。
呢一日，喬寶寶在出生和長大的廟街講故，就由阿爺講起：
佢阿爺同我哋好多人嘅阿爺一樣，曾經好有米，國民黨戰敗，由上海走難走到落嚟香港；
佢阿爸又同我哋好多人嘅阿爸一樣，一個人打三份工，捱大一家八口，阿媽都攞過啲膠花返嚟全家一齊黐一齊賺嗰一個幾毫。
佢同我哋好多人都一樣，小時候睇成龍洪金寶、喺廟街睇相買衫褲鞋襪，中學迷關之琳溝個生得似關之琳嘅女同學溝足兩年，為咗佢地鐵扮偶遇、為咗佢走去麥記打工，上演過「地下鐵碰著她」的戲碼，仲即場唱返首「我墮入情網，你卻在網外看，始終不釋放......」
佢唯一同我哋唔同，係冇得申請回鄉證、老婆攞唔到特區護照、先天呼吸系統有病嘅細仔享受唔到免費醫療，最終，逼於無奈要舉家離開香港移民蘇格蘭。
「點解要我哋做二等公民？點解交咗廿幾年稅、冇犯過事，想享有應份嘅福利都唔俾？點解土生土長但要睇你有冇中國血統？係唔係我哋印度人對香港有貢獻呢......又話種族共融?
係囉，點解呢？
想入籍都係為個仔
其實成件事都係為咗個小朋友。我細仔 03年喺蘇格蘭出世，先天脊椎有問題，睇咗十年醫生，左搖右擺主流學校又唔肯收佢，我搵埋搵埋六七成都係使喺佢度。老婆揸印度護照次次都要攞簽證，想申請特區護照唔係要攞著數，都係想帶個仔去蘇格蘭睇醫生啫。我喺香港出世，老婆都嚟咗廿幾年，交足稅冇案底，點解應份嘅權利，想放棄印度籍都唔俾？ 2012年係我事業最巔峰，有得做《瘦薪兵團》男主角仲有得唱主題曲，但要擺低哂同老婆去坐移民監，所有嘢都真係整定。
政策專蝦窮人
點解係都唔發俾特區護照俾我老婆？我自己做紀律部隊，佢俾定唔俾，唔使同市民解釋。打官司過程長，同埋好多錢，呢啲政策根本就係蝦窮人。點解一個中國人，揸住英國美國護照可以攞回鄉證？但一個喺香港土生土長，揸住特區護照嘅人，冇得攞？佢話一定要中國血統喎……我覺得如果喺平等機會嚟講，我哋好唔抵。又話種族共融嘅？我知同政府好難鬥，但我會用平和開心嘅方法繼續爭取應得福利。
『 05《殘酷一叮》
《蘋果日報》圖片
『 10《月滿軒尼詩》
教科書冇教嘅嘢
點解一定要我哋做二等公民呢？係唔係我哋對香港冇貢獻呢？ 1841年英國嚟香港插旗，最前線嘅紀律部隊就係印度人為主；香港同九龍接軌功勞又係一位印度人；香港大學創辦人有一個印度人；中電，雖然貴啲，但係都係印度人開。印度人對香港好多貢獻，呢啲教科書唔會寫，個個都覺得印度人嚟係爭飯食、攞福利。
住咗四十年廟街
我屋企最早係阿爺，俾個英國老闆帶去上海，阿爺又帶埋阿嫲一齊去，我阿爸就係喺上海出世。後尾阿爺再嚟香港，講起又有段故，佢離開香港之前係喺廟街睇相，睇相佬同佢講佢最多七十歲命，佢計計條數，大半世人都喺上海同香港，死始終都係想返印度死，跟住就返咗印度。阿爺嚟香港時，上海街好貴，我哋住深水埗，直到我出世，一家人搬咗去廟街，一家八口劏咗五間房，仲有間房租咗俾個後生仔，一住就四十年。
做懲教學粗口
我啲廣東話咁好，都係要多謝古惑仔，一畢業就入懲教，啲粗口、謎語、對聯全部嗰陣時學識。嗰度叫佢哋乖啲要俾煙，講真，要教得識佢老竇老母一早已經教精咗佢哋啦。我入去啲古惑仔成日都笑我啲廣東話，呢啲都係對住鏡自己練返嚟㗎，朋友！我做過十個環頭，青洲、白石、萬宜、芝麻灣，轉軍裝之後就轉咗去石壁。石壁係高度設防監獄，嗰度都係重犯，林過雲、 Hello Kitty嗰啲就喺嗰度。惡人冇樣睇㗎，林過雲都係啦，斯斯文文、靚靚仔仔。
我 24K大曬！
試過有一次，閉路電視影到成班古惑仔圍住，同事話阿 sir睇住，叫班古惑仔散開。我行落去講啦，佢哋睥一睥我話：「××開緊會吖，過主」我唔知死：「你××開會？我 24K足金，我贏！」佢哋本來圍住個圈，跟住個圈變咗圍住我：「你咩事吖？你依家係唔係踩我單位吖？」阿 Sir幫我解圍，班古惑仔要我道歉：「 Sorry囉……」「大聲啲吖！」我心諗，依家係我睇犯，定啲犯睇我吖？
『 12《衝呀！瘦薪兵團》
《忽然 1周》圖片
『 12《喬寶寶棟篤笑之我係香港人》
我墜入情網
嗰陣時讀中四，三個本地女仔入咗我哋學校，其中一個好靚，靚到似關之琳，我望咗佢一眼已經墮入情網喇。我成日幫佢，因為我想溝佢吖嘛，有一次佢舉手，我叫佢咩事等我幫……佢話唔係喎，佢舉手係想同阿 sir舉報我成日騷擾佢喎。我日日早兩個鐘頭起身等佢出門口、離遠跟住佢搭地鐵但又唔俾佢見到，隔幾個站再扮撞到佢，好似好有緣份咁……其實我覺得緣份呢啲嘢係做出嚟嘅。
五蚊時薪執Ｍ巾
錫克教嘅男仔唔可以剪頭髮，我為個女仔剪咗頭髮，返到屋企，阿媽喊曬……我好錫阿媽，佢一滴眼淚我都接受唔到，於是我就跑咗出街，迷失方向一樣喺條街衡量……到底阿媽重要定初戀重要？後尾我都係追到個女仔嘅，但阿媽唔俾零用錢，我都要拍拖㗎，就走咗去應徵麥當勞。經理話廚房冇位、收錢冇位，唯獨廁所有位，五蚊一個鐘做唔做？梗係做啦我，五蚊仲包一個餐。不過放飯坐喺員工休息室食同事嫌我臭叫我去廁所食，肯去廁所食就有多個飽，我都制……不過我肯定，做咁耐我執嘅衞生巾一定多過食佢哋嘅包。
盲婚啞婚冇乜野
但係拍拖一年唔夠，就俾我姨媽撞到話咗俾我阿媽知。阿媽即刻搵咗三張相俾我揀，一個喺加拿大有個仔、第二個大我十歲，第三個就係自己鄉下嘅處女，我揀咗第三個，嗰年 19歲。睇完老婆張相，第一次見佢就係結婚嗰日。圍住錫克教牧師行完四個圈，就可以揭開佢頭蓋，一揭……嘩，原來印度攝影沙龍技術係咁好！傷心，頭一年可能會有，點都會掛住，我追佢都追咗兩年啦，但印度嘅文化就係咁，俾人拆散咗我都唔覺得係咩 big issue。盲婚啞嫁我唔覺得有乜嘢，講真我哋都係父母曳豬嗰陣生出嚟，我哋係屬於父母，洗咗腦㗎啦。我哋印度人好信報應，唔尊重父母，第時我哋做父母，就輪到我哋。
『 13《我愛 HK恭囍發財》
『 12再見香港
網上圖片
淨係老婆撐我遞信
05年參加完殘酷一叮，成龍套《寶貝計劃》搵我拍。佢哋話可能要拍一個月……喂，同成龍大哥拍戲喎，咪話一個月，一年我都願，嗱嗱聲同懲教攞假。但嗰年就係 WTO喺香港開會，所有紀律部隊取消休假，阿頭話：「天王都冇情講，唔好話你係『叮王』！」朋友話：「你唱得咁交叉難聽，諗清楚」但返到屋企，係我老婆打咗支強心針俾我，結果我就喺 24小時之內遞信，辭咗份已經做咗 16年嘅工。嗰陣大仔已經送咗去英國讀書，一辭職，教育津貼、房屋津貼乜都冇哂。
我開心因為我知足
開頭入去電視台，當然有啲 hard time，成日有啲人講埋哂啲刀刀「差差」嗰啲嘢，好難聽：「嘩，喺深水埗托布托到入嚟電視城吖？」唔係點？我都洗濕咗頭，又唔係唱得跳得、又唔係靚仔睇得、中文唔睇得唔寫得，跟住就識咗黑妹姐（李麗霞），佢話我唱嘴甩 key甩歌詞，教識我唱歌仲教埋我粵劇。我個人易知足，勤勤力力養起頭家就得，我啲褲喺廟街買、件 T係錫克教標誌、個袋都係親戚送，當你個易知足就好容易開心。
原來如此
喬寶寶真係好吹得，一講兩粒鐘，講到攝錄機都要換電，講到由佐敦道牌坊一路行到榕樹頭都仲有故仔：「悶唔悶吖你哋？」如假包換，榕樹頭下講故佬：「監獄好多專用名詞，小便係「擺柳」，大便係「擺堆」，番梘叫「滑石」，因為冇人想返嚟再坐多一揀，「拖水」係毛梘。一個月係「一隻」因為一個月派一次雞翼，「一碌」係一年，因為一年派一次香腸」。一啲都唔悶，好多都係我同攝影哥哥首次聽聞，有一下其實有啲亂：到底佢定我哋至係印度人？
|
鍾意就快D Share啦！
|
|
|
