一年一度嘅Mobile World Congress（MWC）日前於西班牙巴塞羅那舉行，各大廠商都於會土場內展出或公佈旗下各有特色嘅最新產品。有趣嘅係，來自中國嘅Lenovo以及手機品牌Infinix，就不約而同地推出能夠用太陽能充電嘅手提電腦以及手機。 | |
由中國傳音控股於2013年創立嘅Infinix雖然唔係主流手機廠，但過去曾多次展出充滿「花臣」嘅概念手機。而今次於MWC 2025中，佢哋就展出一部未有正式名字嘅「太陽能手機」。手機背面內置品牌稱為「SolarEnergy-Reserving Technology」（太陽能儲備技術）系統，簡單黎講即係比起傳統鋰太陽能電池更平、更高效嘅「鈣鈦礦太陽能電池」（Perovskite solar cell）配上能夠平衡充電效率及熱力嘅AI控制技術，令到部電話能夠利用太陽能以最高2W嘅速度充電。 單睇「2W」呢個充電速度，你都估到部電話唔可能以太陽能作為唯一電力來源。而據有去會場嘅外媒報導，Infinix指太陽能充電嘅目的係「你唔用部電話時稍為幫補一下」，延長手機使用時間；另一邊廂，當遇上停電、或身處野外之時，太陽能亦可以作救命之用。 | |
 
| |
另一邊廂，Lenovo就公佈有正式名稱嘅太陽能充電手提電腦「Yoga Solar PC」。電腦面板嘅背面係一整塊太陽能面板，加上將支架及電線都隠藏於內部，能夠以最大面積接觸陽光，轉換率最高可達24%。即係究竟充到幾多電呢？Lenovo就話部電腦曬20分鐘太陽，就可以睇1個鐘片。但目前Lenovo內部仍在測試於低光情況下嘅充電效率。至於電腦內部則會配上Intel Luna Lake處理器、32GB Ram以及1TB儲存。 另外Lenovo仲推出一塊針對其他Yoga系列手提電腦嘅太陽能充電板。兩摺式充電板自帶支架可以站立，可以用USB-C直接為電腦充電，亦可以充入附送嘅行動電源之中。 | |
資料來源：PR Newswire、Lenovo | |
|
鍾意就快D Share啦！
|
|
|
