話說早排我發現部iPhone明明有個幾舊水嘅名牌殼，但結果都係跌/撞爆咗後面塊玻璃，反而個殼本身就毫髮無損，於是我就開始反思，究竟手機殼係咪真係有實際用途呢？然後我就發現，原來外國近來興起一股「裸跑iPhone」熱潮，外國媒體《Makeuseof》仲整理咗六個常見嘅「裸跑iPhone」原因，唔知大家睇完後，又會唔會對「手機殼」改觀？ | |
圖片：Apple | |
《Makeuseof》提出咗六個越黎越多人「裸跑iPhone」嘅理由。首先就係每一代iPhone都會透過更新物料黎增加手機、特別係螢幕及後玻璃嘅防摔性。雖然同3310相比佢仍然「屁也不是」，但比起早年嘅iPhone又的確係冇咁豆腐。考慮到手機殼嘅最大功能就係防摔，手機本身嘅防摔性提高，自然就減低某部份人使用手機殼嘅意圖。 第二個原因，就係手機殼不利手機散熱。相信大家打機、睇片、甚至叉電時都會發覺手機變熱，而手機殼為咗達到全方位保護，通常都包到部機實一實，有如一件外套咁阻礙散熱。 第三個原因，就係因為大家換機頻繁。《Slash Gear》於2022年做過一個調查，發現有55.5%美國人每2至3年就會換一次電話，基本上即係上台出機、合約到期就換機。當中更有11.9%係年年換機。既然過多陣都換機，用家自然唔會使錢於保護部機之上。 | |
 圖片：《Succession》劇照 | |
另外三個原因，就全部都同個人造型有關。例如有人認為iPhone本身就有屬於自己嘅美感，用個殼包住佢係本末倒置，所以情願冒「爆mon」風險都要「裸跑」；另一原因，就係早年女士興用啲幾乎乜都放唔到嘅「小廢包」，空間有限之下就唯有幫手機「減肥」先塞得落個袋到。 最後一個原因，就係因為現實中嘅富豪名人、以及影視作品中嘅富豪名人都不約而同地「裸跑iPhone」，令「裸跑iPhone」成為財富及身份象徵。去年《Time Magazine》甚至寫過一篇針對富豪們「裸跑iPhone」嘅報導，並分析指出「裸跑iPhone」背後展現嘅係「老子有錢，爆咗就換」，以及「出入有司機、開門靠工人，所以只需兩袖iPhone」嘅氣勢。即使係著正裝返工嘅白領專業人士，都可能因為件度身訂製嘅西裝放唔落有殼iPhone而選擇「裸跑」。以上種種都令「裸跑iPhone」與「身份地位」產生連結，於是引來模仿。 | |
資料來源：makeuseof、Slash Gear、TIME |
|
鍾意就快D Share啦！
|
|
|
