熱爆娛樂 +: 【荷里活罷工潮】傳華納兄弟考慮將《沙丘瀚戰2》《水行俠2》《紫色姐妹花》延至2024年上映 #沙丘瀚戰

2023年7月21日星期五

荷里活罷工潮罷工潮愈演愈烈，除咗製作中嘅影視作品全面停擺，就連已煞科嘅電影亦可能延期上映。

據外媒《Variety》獨家報導，華納兄弟預計罷工潮無法在秋季中期解決，目前正考慮將原定今年11月上映嘅《沙丘瀚戰2（Dune: Part Two）》，以及喺聖誕檔期上映嘅《水行俠2（Aquaman and the Lost Kingdom）》及新版《紫色姐妹花（The Color Purple）》延期到明年上映。但由於《沙》係聯同傳奇影業合作，需要雙方都同意先能夠改期，據了解目前雙方尚未進行討論。
《紫色姐妹花》
按現時演員工會罷工規定，所有工會成員都唔能夠出席任何宣傳活動、巡迴及訪問，意味片商無法邀請演員為電影宣傳造勢，必然對票房構成影響。特別對於《紫色姐妹花》呢類有意爭奪奧斯卡及金球獎嘅電影，演員出席競選活動尤其重要，所以華納兄弟打算將電影延後上映。
  
除咗華納兄弟，Marvel Studios預定11月10日上映嘅《Marvel隊長2（The Marvels）》、獅門影業預定11月17日上映嘅《飢餓遊戲：鳴鳥與游蛇之歌（The Ballad of Songbirds and Snakes）》，以及由Joaquin Phoenix主演、預定11月22日上映嘅《拿破崙（Napoleon）》都可能會延期，詳情有待各大片商確認。