著名動漫《遊戲王》作者高橋和希老師，於今年7月被發現於沖繩近海溺斃，由於其遺體被發現時身穿浮潛裝備，屍體又曾被魚類破壞，所以當時大家都估計高橋老師係浮潛時遇到意外，或被鯊魚襲擊而喪命。不過近日美國媒體就報導，一名駐沖繩美軍指高橋老師當日係為咗救人先落海，最終不敵急流而離世。 | |
美國陸軍少校Robert Bourgeau 圖片：Stars & Stripes | |
據美國軍人媒體《Stars & Stripes》報導，駐沖繩読谷村嘅美軍少校Robert Bourgeau，因7月4日勇救三名被困海岸嘅人，而被提名針對非戰鬥英勇行為嘅軍人獎章 (Soldier's Medal)。而據Bourgeau少校指，當時高橋和希老師亦有參與救人，並最終喪命。 據Bourgeau少校回顧，今年7月4日下午兩點，身為潛水教練嘅佢與兩名學生於當地會面，期間Bourgeau少校發現當地潛水景點「美人魚石窟」附近有一名日本藉女子求救，女子指向飄浮於美人魚石窟100碼對開海面嘅11歲女兒及一名39歲美軍士兵，當時二人被困於從石窟回湧嘅水流，以及從外海而來嘅六尺巨浪之中。 Bourgeau少校與一名學生沿岸邊淺水位置接近女孩及士兵，Bourgeau少校跳入海中試圖將女孩帶上岸，但回程途中體力不支，加上女孩媽媽唔知點解又跌咗落水，於是佢只好同時扯住母女二人。據Bourgeau少校嘅學生指，高橋和希老師就喺呢個時間跳入水試圖協助，但好快就消失於巨浪之中。 | |
高橋和希老師  圖片：Wikicommon | |
Bourgeau少校最終成功將母女二人帶到淺水處，然後再出去試圖接回士兵，但途中再次體力不支，更需要放棄士兵求生。最終佢成功返上岸，並指示士兵脫離水流成功上岸。 雖然並不認識高橋和希以至《遊戲王》，但Bourgeau少校讚揚高橋和希「是一名英雄，佢為咗救人而喪命」。 | |
| 資料來源：Stars & Stripes | |
|
鍾意就快D Share啦！
|
|
|
