反送中事件持續已經一個月，香港各界亦不能倖免，雖然演藝界的身份較為敏感，以至平常的政治議題大家都紛紛走避，但今次的反送中事件仍有不少藝人發聲支持，當中當然包括因為敢言而被大陸封殺的杜汶澤。
杜汶澤自從被大陸封殺之後，一直努力耕耘，近年更開設網台《杜汶澤喱騷》，成績越來越好，但近日的反中送事件，有網民表示杜汶澤公司旗下的貝依霖疑似「藍絲」，更貼出多張貝依霖（Chantale）於各社交網站的發言為證，質問杜汶澤：「杜先生，你應該好明白你嗰台嘅觀眾係咩人，點解可以一路笑騎騎同咁嘅人合作？」更表示如若不開除貝依霖，將會擺睇其網台。
杜汶澤今日於網台上載一段長達20分鐘的短片「小杜消息」，向觀眾細說事件始末。片段開始事杜汶澤找出一堆貝依霖於社交網站發表的言論，當中有鬧示威者、亦有鬧撐警人士、更有鬧網民的言論，杜汶澤就着每一個言論仔細分析並稱：「佢未必係藍絲嚟，我懷疑佢係一個慒X，即係話，佢見到啲咩嘢覺得不滿就出聲，情況就好似劉美君咁樣，又唔X知，又無端端post個支持警察啊，話咩『我都係唔支持暴力啫』咁樣。」
阿澤言重深長的道：「其實呢個社會評論係好自由，但係我覺得冇嘢係免費，唔係話你上網裝個app，跟住你玩又唔使錢，嗰個錢喺邊度嚟呢？就係你講咗嘅嘢，你會有迴響，呢啲教訓我都受過，我都有講錯嘢，我都有話錯人嘅，之後我汲取咗教訓我都有檢討自己，因為我開始明白，原來上網講嘢係有成本，你係需要為自己講嘅言論負責。」
阿澤之後分析道：「從頭先啲post嚟睇，我覺得佢唔係藍絲，佢係冇乜立場嗰啲，乜都鬧。我好想講嘅係，自從我冇戲拍之後，係幾咁辛苦先至開展咗呢間公司去發展，而我哋公司第一條片過100萬觀看次數，係Chantale拍嘅，呢一幅畫（杜汶澤背後的油畫）就係嗰陣拍，我仲叫佢哋呢幅畫一定要擺喺公司。」
杜汶澤續說：「之後嘅第二條100萬觀看人次嘅片，都係Chantale㗎，佢係我哋嘅開國功臣嚟，如果因為你哋咁樣話我食兩家茶禮，唔炒佢我就係舐共嘅，X你老味我炒咗佢我咪不仁不義？如果我驚咗你，我炒咗佢，咁同當日我被共產黨壓迫，然之後嗰啲藝人，本來同我係朋友，而家連合照都唔肯影；贊助商送開衫畀我，而家連衫都唔敢送嘅人有咩分別？」
杜汶澤又說道：「我最欣賞有一日喺尖沙嘴遊行期間，佢哋除咗好斯文之外，仲向廣東道啲中國遊客解釋整個送中惡法。我覺得，係咪真係要去了解下件事先呢？係咪真係要了解下Chantale，到底係點諗？如果佢係唔知嘅，我係咪應該畀多啲資訊佢知，等佢了解下，檢討下自己如果啲嘢跟得唔貼，係咪應該唔好咁易下判斷？如果佢係唔X識嘅，我哋係咪好應該將我哋知道嘅嘢話畀佢知呢？」
最後杜汶澤於片段尾聲強調：「我係開放討論嘅，我好想畀大家一個同我討論嘅空間，大家可以留言，我會每一個都睇，從而去睇返究竟我哋應該點樣去處理Chantale呢件事。」
|
鍾意就快D Share啦！
|
|
|
