「美魔女」羅霖（Candy）於2015年以半百之齡推出首本個人寫真集《Timeless》後，事隔4年再度宣布出擊推出第二本寫真集《Timeless凍齡美魔法》，與另一「凍齡美女」溫碧霞打對台競爭，引起外界關注。她透露為了今次作品，除了在香港取景外，亦飛到上海、泰國和韓國拍攝，而且尺度亦有別於4年前般以性感為主，營造自己健康的一面，除了有大量靚相之外，亦用文字分享自己的保養之道及凍齡秘訣。Candy為了今次的作品，在一個月內極速減10磅，包括做運動、做機、推脂和按照飲食餐單進食，務求用最佳狀態拍攝。而她透露寫真中共有六套泳衣造型，不過尺度就比以前細得多：「尺度啊，其實我冇諗過㗎，泳衣照我覺得就有別於我四年前出嘅寫真，當時係有啲性感，但今次我覺得泳衣係應該健康嘅，所以我就搵一啲大自然、沙灘去拍攝，感覺舒服健康啲。」而其中最大的分別莫過於，不懂游泳的首次嘗試海底拍攝，她笑言對成品相當滿意，不過其實整個拍攝過程都相當痛苦：「拍攝嘅泳池唔夠深，得1米幾，變咗要打橫瞓喺度，但係又會浮起，所以要綁一舊鉛喺個身度，我要克服少少恐懼因為第一次，同埋我唔識游水！着住條裙濕咗水好重，又要閉氣擘大眼做優美動作，所以個幾兩個鐘影咗好多相，最終只有1、2張用到！」
《Timeless凍齡美魔法》將於7月推出，並在書展中舉行簽名會，Candy笑言會做好自己落力做宣傳，而目前已經收到很多預購單，所以不怕蝕本，並會將投資金額中的十分之一，即6萬元捐給慈善機構：「想本書除咗散發正能量，教大家keep fit之外，希望都可以做到善事。」
|
鍾意就快D Share啦！
|
|
|
