拍拖十年，方力申同鄧麗欣（ Stephy），一直是外界最睇好的娛圈情侶，亦對二人婚訊引頸以待，上星期四（三月十七日），雙方突然透過所屬公司太陽娛樂，發聲明宣布「分訊」，震驚全城。
第二日，方力申喊曬表示分手原因不涉及第三者，但本刊發現，其實早在去年九月， Stephy已另結新歡，被台灣一個有米 TB鄧衍敏（小牛）拗攣；而在小方單拖面對傳媒當日， Stephy就秘密飛到台灣，與 TB風流快活。
傷心小方哭了
上星期五（十八日），方力申在宣布分手後，首次獨自面對全港傳媒時，表示分手並非他個人或 Stephy的主意，而是雙方共同決定，其間小方更講到淚流披面：「我哋都好真心去珍惜呢段感情，所以大家決定咗一段冷靜期，喺呢段冷靜期間，大家都有約出嚟傾偈，過程有傷心，大家都有喊……」
小方傷心欲絕！至於 Stephy，就在這段風頭火勢時間，離開香港，先陪阿媽去日本旅行，並在小方見傳媒當日返港，再即時轉機去台灣。
為了避開傳媒追訪， Stephy將行程更改，又轉航空公司，最後乘搭當日最後一班飛台北客機，在十九號凌晨三點去到台北機場，其時，一架 MINI Cooper早已就緒，當 Stephy一出現，一名打扮男性化的朋友，馬上下車幫她攞行李上車，之後直接開車到台中。
凌晨四點半，到達台中日月千禧酒店， TB友人 man爆幫 Stephy搬行李到酒店大堂，她安排 Stephy坐埋一邊等，自己埋櫃檯 check in，開了一間雙人房，然後與 Stephy一齊上房休息。
21/3 餵食
Stephy同 TB態度親暱，食飯時 TB會主動餵嘢食入 Stephy口內。
剛剛宣布分手， Stephy就飛了去台灣與新歡 happy，兩人去到林森公園拍拖，全程笑容滿面，一啲都唔似剛剛分手。
上星期五方力申淚灑交代分手一事，表現得好唔捨得。 同愛打排球
據了解，這名 TB叫鄧衍敏，人人叫她做小牛，是台灣排球隊健將，與方力申一樣，都是運動員出身，更是導致 Stephy與小方分手的第三者。
「因為 Stephy搞咗隊排球隊，舊年九月有朋友介紹咗小牛（鄧衍敏）俾佢，之後搵佢幫手做客席教練，佢兩個有共同興趣，所以好啱傾又啱 feel， Stephy好崇拜佢嘅球技，加上小牛份人細心，成日都用唔同方法氹 Stephy，咁 Stephy呢啲公主就最鍾意俾人服侍周到，雖然後來小牛返咗台灣，但一有時間就飛嚟香港，每次又會送啲有心思嘅禮物俾 Stephy，好識冧女。
「 Stephy同小方一齊成十年，好似老夫老妻咁，大家都唔會再做啲多餘嘢去氹對方，就算一齊喺屋企，多數都係各自玩手機；突然間有個人，做咁多細心浪漫嘢氹自己， Stephy梗係覺得有新衝擊，所以佢同小牛發展得好快，俾小牛瘋狂咁追咗一個月， Stephy上年十月已經帶埋小牛去見自己啲朋友，我哋都覺得佢兩個（ Stephy同小牛）有啲嘢，不過就冇問過佢哋乜嘢關係，之後，就愈嚟愈少見到小方同 Stephy一齊出現。」 Stephy身邊人說。
當記者問到 Stephy同 TB關係時， Stephy即時黑曬面，而衍敏就用手遮面，非常避忌。
去台中玩完三日， TB同 Stephy返到台北，入住一間酒店，下車時 TB勁 man幫 Stephy攞曬所有行李。
單拖去法會
三月十九日下午一時， Stephy獨自離開酒店，搭的士去到雷藏寺參加一個法會，由於法會信眾多，加上有不少香港人參與其中，怕被人認到的她，全程戴住口罩遮樣，只在食糕點時才拉低口罩一陣。
下午五時， Stephy坐朋友的七人車離開寺廟，返酒店會合 TB新歡，二人全晚留在酒店房，未有外出。
二十號中午， Stephy同新歡退房，離開酒店後揸車到車程要兩個鐘，南投台灣八景之一的日月潭，入住望湖景，普通雙人房要三千元港幣一晚的涵碧樓酒店。小牛將車停泊在酒店停車場後，二人一齊行去大堂 check in，是日 Stephy打扮得更鬼祟，黑衫黑口罩黑帽黑頸巾，幾乎連對眼都遮埋，完全唔見得光。
20/3 攬腰自拍
Stephy將自己包到冚，似乎是怕被人發現她與新歡有路。
去到南投蜜月勝地日月潭， Stephy同 TB都有出街拍拖，雨中漫步好浪漫。
見到日月潭靚景， TB同 Stephy都忍唔住來一個攬腰合照。
行到肚餓，他們企在街邊食茶葉蛋。
大部分時間他們都在房內活動，所以 TB買了兩支紅酒同 Stephy慢慢歎。 黐埋坐餵食
返上房休息了兩個鐘，二人再出動。優美湖景當前，小牛於是攞出一碌自拍神棍，從後攬住 Stephy條腰自拍， Stephy自動波拉低頸巾同口罩，笑曬配合。
之後二人拍拖到附近小街，行小商店又買生果，兩個人隨手攞起乜都可以傾一輪研究一番，行到肚餓就在街邊買茶葉蛋，企埋一邊齊齊食，二人一路食一路傾， Stephy不時望住對方流露冧樣，同甩拖爆喊的小方比，有 TB呵護的 Stephy，完全冇半點傷感。
星期一（二十一日）， Stephy同小牛揸車返回台北，去酒店開房前，先去了王記府城肉糉醫肚，二人在店內最入位置面壁黐住坐，其間小牛更親手餵食，對新歡這個親密舉動， Stephy表現習以為常又受落。
翌日中午， Stephy同 TB又再出動離開酒店，行去林森公園拍拖，突然間 Stephy解除戒備唔再戴口罩，只係戴住頂帽同眼鏡，大搖大擺同新歡拍拖。
TB在 ig上載一張日月潭風景相，更表示是心目中第一名的地方，但她的波友就留言「能跟自己的愛人一起，哪裡都是第一名」。兩人的關係相當公開。
去年九月 TB做 Stephy的排球隊客席教練，兩人因此而搭上。
Stephy同 TB在上年十月就一齊去日本，同行仲有 Stephy的好友。
今年初小方同 Stephy正處於冷靜期，小方為了氹番 Stephy，公開送了個零食籃做驚喜，當時一刻 Stephy都有感動到眼濕濕。
三月九日 Stephy在 ig暗示同小方情已逝。 感情不敵激情
據知，去年十月才開始和小牛拍拖的 Stephy，十一月已經揀定要 TB，並主動同小方攤牌，但唔想就此放棄十年情的小方堅決反對， Stephy只好暫緩分手，提議用三個月時間，大家冷靜再諗清楚。
「其實嗰三個月 Stephy成日都飛咗去台灣搵小牛，就算小牛去咗日本上堂， Stephy都約埋啲好 friend嘅朋友，專登飛過去陪佢，有番拍拖嘅感覺， Stephy好開心；至於小牛都同啲朋友認曬同 Stephy拍拖，仲話 Stephy要低調，唔想俾人知住。」 Stephy身邊人說。
至於小方，在這個冷靜期中亦有想盡辦法，試圖打動 Stephy回心轉意，更在《紀念日》祝捷會上，當眾送了一個零食籃給她，當時 Stephy的確感動到眼濕濕，但十年感情始終不敵激情， Stephy已經變心，被 TB小牛徹底拗攣，無法回到小方身邊。
19/3Stephy凌晨三點去到台北機場， TB一早就到機場接機，之後二人直接揸車去台中。
在酒店 check in時， Stephy坐埋一邊玩電話。
當日下午， Stephy獨自去法會，聽了三個小時佛經。
Stephy同 TB除了二人世界外， TB每次來香港， Stephy都會帶她出席朋友聚會。
近期小方寄情健身，原來是因為同 Stephy分手，要靠運動減壓。 女排國手
現年 32歲的鄧衍敏（人稱小牛）是前女排國手，就讀華僑高中大觀國中，家境富裕，其後舉家移民美國，而鄧衍敏則留台灣發展，做排球員期間曾參加過多次比賽，包括五次台北世界大學運動會，先後攞過多面金牌、銀牌。
12年，鄧衍敏在亞錦賽後宣布退休，退役後，接任台北市立大學女排教練，中性打扮的她，多年來身邊不乏女伴，去年便曾與網球好手莊佳容拍拖。無論名氣外表及身家，鄧衍敏絕對是排球界中的風頭躉。
衍敏與台灣藝人王大陸相熟。 童話的結局
方力申跟 Stephy由熒幕情侶變成真正情侶，其間屢傳婚訊，可惜，十年童話，最終被攣情擊潰。
01年， Stephy加入金牌，跟其餘八位成員組成 Cookies，即被同公司的方力申一眼睇中，可惜，追唔到手。
06年，二人合唱歌曲《好心好報》和《好好戀愛》傳出緋聞，其後首度合作拍電影《獨家試愛》，朝夕相對，加上戲中唔少親熱戲，最終戲假情真，發展地下情，接住再合作《十分愛》、《我的最愛》等愛情小品，令戀情升溫。
10年，鄧麗欣與方力申蜜遊馬爾地夫斷正，二人避無可避，默認戀情，關係浮面。
11年，二人齊齊滿約金牌，情侶同心、共同進退，孖住北上搵真銀。
14年，以情侶檔姿態參與王祖藍及李亞男的電視訪談節目《蜜月到訪》的錄影，並大方暢談二人交往差不多九年的經歷與甜蜜回憶，當中更提及當年發展地下情的苦況。
15年，雙雙回港發展，歸隊 Paco太陽娛樂旗下，再度合拍愛情片《紀念日》，飾演夫婦。
16年， Stephy跟方力申透過公司發聲明宣布分手，結束十年愛情長跑。
異軍突起
愛情無分國界性別，但有不少圈中人受情傷後，性取向突變，潛藏性向，總要受傷後才被發揚光大。
攣變直
容祖兒 何韻詩 劉浩龍
容祖兒與何韻詩拍拖五年， 12年，劉浩龍趁何韻詩到內地巡迴，撬好友牆腳，並單方面承認與容祖兒拍拖，師兄即成罪人，相識十年好友，絕交收場。
吳君如 俞琤 陳可辛
吳君如與杜德偉結束七年情後，一度與俞琤傳出緋聞， 94年，俞琤投資君如主演的電影《四面夏娃》，更傳出二人於大潭雅柏苑同居，其後吳君如與導演陳可辛拍拖，不婚生女，緋聞才告一段落。
直變攣
何超瓊 許晉亨 俞琤
10年，與許晉亨結過婚，同楊其龍拍過拖，近年改投密友俞琤懷抱，多年來二人愛得低調，但經常被斷正出雙入對，早年，更被拍到十指緊扣蜜遊巴黎。
何超盈 Greg 林愛兒
賭王四房長女 12年與男友 Greg結束四年情後，大受情傷， 13年搭上林建岳 TB愛女林愛兒，當街又攬又嘴更火速同居，超盈經常在對方九龍塘大宅過夜，四太得知即出手阻止，更直斥「發神經！」
關菊英 黎小田 周偉利
82年下嫁黎小田，結婚兩年離婚， 09年，關菊英承認搭上同性密友周偉利，並公開視對方為終身伴侶。
金燕玲 梁廷斌 蘇施黃
先後經歷過兩段婚姻， 81年與采蝶軒老闆梁廷斌離婚， 89年再婚並育有一女， 05年再度離婚，其後搭上同性密友蘇施黃，情侶關係完全公開。
張國榮 毛舜筠 唐鶴德
唯一承認自己係雙性戀的藝人張國榮，曾公開與毛舜筠交往，並一度閃電求婚，可惜失敗，後來，哥哥戀上唐鶴德，二人愛得痴纏。
|
鍾意就快D Share啦！
|
|
|
