住響香港既人總係好中意嘈佢地既交通有幾唔掂，好似成日話，九巴幾時又加價班次又唔準。港鐵仲衰格、加價都不特止仲要壞車。拿，公道講句，嘈都好正常，正如古語有云，有批評先有進步。環觀世界咁多個發達城市，有邊個地方係唔中意批評。不過如果響澳門生活返幾年，仲要咁唔好彩你返工既地點係行唔到去你住既地方，經歷一段時間之後，你就會開始掛住九巴同港鐵，甚至有種衝動想即刻腿張開俾佢地老強。
有去梳打埠玩過既朋友即刻問：「有無咁差呀？」我心諗，過大海玩既港燦，十個有十個坐發財巴，點知民間疾苦呢。甚至有朋友過黎玩，我話同佢去坐巴士，佢樹熊咁既樣望住我：「下，乜澳門玩要俾錢坐巴士既咩？」所以，你真係唔會明。
如果係一個北京人落黎澳門，經歷過北京地鐵果種你唔下車都俾人夾到下車，自然接受到響澳門搭車。響香港生活開，就好難令人接受同樣係一國兩制下既城邦淪落到咁既地步。先講排隊呢樣野，雖然排隊並唔係所謂既國際標準，響澳門坐巴士，無排隊之餘，架車埋站都未停低，全部人唔理係地盤佬自由行定係著住老西，個個都一窩蜂衝曬上去擁到實一實。如果等緊車既人係北韓人民，我好肯定，個車門係金正恩。
咁好彩俾你上到巴士，如果你話澳門細迫都係迫一陣好快下車，咁你就契弟嘞。相同距離，俾你響香港坐廿分鐘既，澳門坐巴士閒閒地都搞返你成粒鐘。返放工坐起巴士上黎加個塞車，兩粒鐘不是夢。車程耐都算，我頂佢座位仲要得丁屎果幾個。好啦，無位坐唯有安慰自己，個位都係聞人屁股。企住本身迫都唔係問題，港鐵都係咁迫。最大分別係港鐵都算企得舒服，港鐵達人，兩隻手玩手機都仲得。響澳門就無呢支歌仔唱。國產巴士行車搖下搖下好似就黎散咁，避震拋到開花，再扔多幾個灣，出盡奶力緊握扶手手都扯斷咁滯。返工散左一半，坐巴士就散埋果另一半。
香港坐巴士有得座下訓下打下機睇下劇。澳門坐車除左捉住扶手，就係捉住扶手，巴士痴漢想丁都無手可以用。難怪響澳門街有咁多人自己買車。塞車係預左，至少都叫返放工果陣有細藝過下日辰。聽聞澳門學生留級率亞洲第一，咁垃圾既交通肯定起左唔少貢獻，至少我呢種考試前仲響巴士溫書既廢青肯定上唔到U。
講到澳門自己揸車，多左人有私家車，條路塞左都好正常。有人話買左車唔一定會揸。澳門公共運輸垃圾到呢個程度，你話有錢買架車返黎平時去迫巴士，搵鬼信啦。好多司機嘈車位貴，又話工程搞到條街少左幾個車位。一個月新增九百幾架機動車，當有一半係機車，每月幾百架私家車，都夠推曬個車位月租上去。有錢買車，其實都唔一定有腦。
澳門街最搞笑既係，政府一邊話要學新加坡控制私家車增長，一方面平時路邊車位平到喊，幾蚊個鐘，唔揸車就有假。香港過黎澳門既同事，好多都自己有部車。唔係因為佢地人工高，係買車同牌費平到笑。另一邊，廢車無地方去，廢車場收車價又平，好多澳門人換車，都情願萬幾蚊賣舊車出去算數。有同事平到用七千蚊買左部企企理理既車，平時泊街邊，一個月抄一兩次牌，都平過響香港泊停車場啦。
澳門，不過一個沙田既大小。搞到一鑊粥，到底係澳門人太忍得、還是有錢就塞得住把口、又抑或好多響香港係接受唔到既野澳門人覺得係理所當然，我唔知道。只係呢一刻，我響一架迫滿人既巴士又試塞住左。澳門既交通，就好似當年Nokia手機入面既貪食蛇，自己圍住一圈，然後，收皮了。
|
鍾意就快D Share啦！
|
|
|
