| 【揀套香港賀歲片】過年睇黃子華《乜代宗師》需要理由嗎？ | |
子華神話「假作真時乜都假」，我話白作黑時乜都黑，近來世界唔易過，所謂年關將至，過年想開開心心睇場戲都唔易，當然我滿有寄盼望新春真係可以開心睇場戲食串魚蛋，而今年上映的賀歲片有好多部，大家揀戲其中一個重點係睇有咩選擇，如果你係廣東話流行文化中成長，多多少少都會受「黃子華」的棟篤笑影響過， 子華神影響一整代香港人，無論有咩小風波， 做法不完美，但可接受，要改善的其實是人的心，把心再拉遠拉闊一點，睇大圖畫我們要保護的不正正是一種生活形態和語言文化嗎？我推薦黃子華《乜代宗師》成為我們的賀歲片，因為無論故事文化語言都同香港這塊彈丸之地緊貼不分，黃子華的創作如果都唔夠地道香港，我想我們的文化真係已經絕命絕體，至於其他風波係咪賣樓集資，拍攝有無越界，好難拿住間尺吋吋度住，一手斬過去大叫「過界」，我小學都唔會咁做，不如放鬆一點睇下預告，香港人未有一張選票前選住一張「戲票」先，如果選部賀歲片都咁難選，比張選票大家可能都係缺席飛去韓國食魚旅行。 黃子華係香港一個傳奇，電影做得很好嗎？未必係最好，你記得一蚊雞保鑣？ 歌唱得好難聽嗎？我們都喜歡“做隻普通的馬仔”“我有小小強”。棟篤笑講得很好嗎？ 反正好多人認為後無來者前無古人，黃子華絕對係香港帶領棟篤笑藝術一代宗師。風水佬呃你十年八年， 黃子華我哋睇足咗佢三十年。 喺迷霧裏面秘密走出嚟話退場嘅公開信，你信到十足！ 反而用30年時間帶領香港棟篤笑粵語文化嘅香港人，你覺得佢唔夠香港， 香港人有幾多人從來冇過關越過過深圳河的企出來！本來作為愛電影嘅人介紹一套電影推薦嘅原因主要一定係電影吸引之處，但係今次我推薦乜代宗師其中一個原因係黃子華三個字。 1990年黃子華喺香港推出第一個棟篤笑娛樂圈血淚史， 兩年之後香港人其中一部最經典電影大作《家有囍事》先至面世，排隊都係黃子華先，當然兩種唔同嘅媒體棟篤笑同電影表達嘅方式非常唔一樣， 但同時成就屬於香港人嘅經典，今時今日2020年了， 世界都在變，而變得最小嘅可能只有黃子華。 黃子華自編自導自演《乜代宗師》電影劇情： 馬飛龍是馬家雷拳第十九代傳人，卻因一次意外中，於街頭眾目睽睽下被一名女途人擊倒，而大出洋相，一夜之間身敗名裂，淪為「乜代宗師」。後來馬飛龍從記者口中知道女途人大有來頭，原來她是香港西洋拳壇傳奇人物，曾經擁有四十場不敗紀錄的奇女子 — 陳真 ！ 以上簡介可以話唔入場都唔知佢講咩，所以，只能入場睇！正如黃子華棟篤笑唔入場，無論過後睇返dvd定係聽人哋講總係冇咁好笑， 黃子華長期都係訓練緊香港人用腦思考諗一諗先識得笑。2020年1月22日香港人識得揀屬於自己的賀歲片，如果我萬不得已只能夠睇一部電影，應該係呢部排先， 唔需要原因㗎！ 
| |
|
鍾意就快D Share啦！
|
|
|
