近排忙住拍新戲《PG愛情指引》嘅莊思敏，搽黑塊面扮朱古力，塊面黑心情都唔好得去邊，佢啱啱就火火哋喺微博寫咗句「如果工作是等於唔尊重工作，咁我祝你無工開」之後加多句「Fire！」隔住個mon都feel到佢㷫爆﹗
。
事後佢就喺電話同《蘋果》記者講：「佢係一個男artist，作為演員，首先佢唔應該管其他演員工作、造型。人哋多嘢做，佢又唔抵得，話多嘢做嘅演員唔尊重香港電影行業，咁古生（古天樂）、阿Bob同音音姐咁多工開，唔通佢哋又唔夠專業咩？其實佢喺網上講呢啲說話前，我係有同佢發生咗啲事，所以我幾肯定係針對緊我。」
莊思敏話自己以事論事，但唔想好似鬧交咁，所以唔打算開名講男藝人係邊個。
不過喺莊思敏講呢句說話前一日，記者發現同莊思敏同屬蕭定一旗下嘅「男神」王宗堯，喺自己Facebook寫咗：「如果你為出鏡曝光就咩都做，你只不過去襯……如果你為數字而拍戲而不是為真正的用心去表演，咁你同老臨有咩分別？Right cast is more important！Show some respect to Hong Kong movies!」
兩段嘢咁首尾呼應，唔使畫公仔，都知莊思敏鬧緊邊個，咁男神會唔會拆彈呢？答案係──唔會。佢喺電話回應呢件事就話：「我係有唔啱，唔應該喺網上平台講呢件事，但識我嘅人都知我係理直氣壯，你一年好多戲拍，唔代表你就係好戲，我係為咗件事而緊張。」
王宗堯話自己有唔啱，但就冇諗過搵莊思敏解釋，見到面亦唔會面阻阻：「我同佢都唔同派系，佢係葉念琛派！」
http://hk.apple.nextmedia.com/enews/realtime/20151208/54514253
同王宗堯冇friend做
莊思敏委屈喊爆：從來都唔係朋友
莊思敏喺網上表示遭男神王宗堯針對，又話「Fire」，而王宗堯回應時自己理直氣壯，唔需要同莊思敏解釋，又指佢係葉念琛派。
今晚莊思敏喺尖沙嘴出席電影《神行太保2016》煞科時，被問及同王宗堯隔空開火，忍不出喊爆，仲揚言同王宗堯以後都唔係朋友，絕交收場﹗
記：記者 莊：莊思敏
記：點解眼紅紅？
莊：今日有啲攰，噚日晏晝開工開到0依家。咁呢件事回應，要回應呢件事都有啲尷尬，因為始終大家係同事，但係唔高興。
記：點解唔高興？
莊（喊爆）：呢件事有啲複雜，好難去交代清楚（喊...）我唔覺得有人係可以唔尊重我..（繼續喊）其實事緣係一個角色，因為本身公司開《導火新聞線》（電影版），我原先被指派角色係做記者，後來我開咗《PG戀愛指引》，要將頭髮染金，開緊PG時，老細話想將我角色轉做談判專家，我覺得冇問題，大家都知政府公職人員，必須深色頭髮，試造型時，我已經同導演及監製講咗，可以戴假髮或者噴黑彩去解決問題，但王生（王宗堯）好堅決覺得我係唔適合做呢個角色，佢叫我同老細講，不如做番記者。
我同老細討論過呢件事，後來我得到回覆，我不如公開比大家睇下，我哋之間對話係點，既然有人覺得自己講嘢，係理直氣壯，我都可以好光明正大話畀大家知，究竟發生乜嘢事？（然後拎手機騷短話內容），我同王生對話係一段，大家可以睇清楚，我唔覺得佢作為一個演員，可以去決定另一個演員開唔開工。
記：係咪好委屈？
莊：我覺得係呀，我唔理解點解一個人可以咁樣做囉？我諗大家聽過一句話：「斷人衣食者，猶如殺人父母。」點解佢作為一個演員，去決定另一個演員演出機會呢？
記：回應話你唔願意遷就角色？
莊：我從來都冇唔願意遷就角色，我一路都講緊可以噴黑采或戴假髮，我唔可以染返個頭，因為PG連緊戲，我都要尊重另一個劇組，而且檔期從來都冇撞過期，從來都冇因為檔期問題有任何爭執，一路《導火》Mark我期，我都畀咗佢，冇撞期問題。
記：咁件事點解決？
莊（決絕mode）：件事唔需要解決，我諗有啲說話佢講咗聽咗，得喇明0架喇，大家從來都唔係朋友，以後都唔係（朋友）。
記：同公司面阻阻？
莊：同公司見到咪見囉，我哋公司咁多人，唔都需要一定講嘢嘛。
記：繼續拍呢部戲？
莊：喺我立場，我覺得我接咗就要繼續做。（本身同佢多對手戲嘛？）唔多，係冇。（冇對手戲點解干涉你呢？）我唔明，若然係記者角色會有，談判專家就冇，所以我唔明點解佢要管埋我角色，同埋我唔理解，佢憑乜嘢佢挑戰及評價人哋演技。
記：老細有冇做和事佬？
莊：老細暫時冇直接接觸我。（以前有冇過節？）冇，從來都冇乜交往。
記：如果再做返記者角色，咪有對手戲？
莊：如果係做記者角色，係會有，但今日為止，都未有任何改變，做談判專家。
|
鍾意就快D Share啦！
|
|
|
