22歲的陳凱彤（Lillian）是今年英皇唱片力捧的「重量級」新人，月前推出處女專輯《A Little Bliss》。不過英皇老闆楊受成出聲下令要她減肥，Lillian以娃娃菜減肥法，成功搣甩80磅！
Lillian日前接受《頭條日報》專訪，表示自細就熱愛唱歌，曾參加過無數歌唱比賽，直至13年參加英皇新秀歌唱大賽奪得總冠軍先被英皇羅致順利晉身樂壇，當年她唔只唱功了得，連200多磅的身形都一樣夠件頭。
不過，在老闆楊受成一聲令下，Lillian即地獄式減肥，多得經理人霍汶希提供的「娃娃菜」減肥菜單，Lillian成功搣走80磅贅肉搖身變做「索女」。
陳凱彤坦言貪食，所以身形可以暴脹到「大肥妹」的地步：「唔係真心愛唱歌，真係無動力去積極減肥！」她坦白地說。事實上每次見到楊生（楊受成），老闆劈頭都係一句：「keep fit」提示她身形真係亮起警號！
Lillian唯有乖乖從命：「講真，當時我又真係太肥嘅，我個人好易肥，食小小就肥嘟嘟，出晒雙下巴，而且骨架大，除非減到好纖瘦，否則睇落仲係好大份。Mani（霍汶希）見我要地獄式減肥就介紹我食娃娃菜，呢個係佢累積返嚟嘅心得，因為白烚娃娃菜帶甜，冇其他白烚菜咁難食，有時我會加幾塊白烚肉，當然冇飯落肚，所有澱粉質同煎炸嘢都要戒清，依家食得好清淡，加埋做深蹲運動修緊臀部及手臂肌肉，希望對整個身形有幫助。不過，上次見到師姐容祖兒都有激讚我減肥成功。」
Lillian希望每次見到老闆，不論唱功及外形都獲讚就最好不過了，她笑說：「楊生都好錫我嘅，我只係一個新人，但佢會同我交談，仲好照顧我，提我有咩唔明可以問同事。公司雖然多藝人，但好似個大家庭咁好照顧我。公司又對我好，新唱片封面我都有參與意見，所以我要更加努力，唔好令佢地每個人失望。」
來源 source: http://bastillepost.com
|
鍾意就快D Share啦！
|
|
|
