身為80 90後，跟團去旅行可能只是一個童年回憶：
細個時放假跟父母出外去旅行，通常都是跟團
因為在不久的以前，資訊不像現在那麼發達
沒有隨傳隨到的 Wifi 或當地平價Mobile Data可以隨時上網查google map
跟團往往是最划算最方便選擇
時移世易，今天我們去旅行都喜歡自己買機票酒店package，加一本旅遊書與Wife蛋便走遍天下。
但是偶爾，可能家人的preference，或是某些地區實在跟團比較安全（如印度，南美，中東等地），我們還是會跟團。 跟團，往往發生以下幾件事，有些好有些壞，希望旅行社留意到的話可以檢討甚至回應：
1. 暗自盤算其他團友的來歷
在機場指定時間集合，會留意到其他團友：燕瘦環肥，是Well-dressed還是穿搭奇怪，以及年齡層….
大概可以推斷，呢團人會是好玩投契，還是嚴肅冷漠
2. 堅拒戴上旅行社徽章
雖然領隊多次懇求大家戴上旅行社徽章，但50歲以下的人基本上都不會佩戴的，因為真係頂唔順，太老土。
3. 行程：趕鴨仔 走馬看燈
跟團走馬看燈是常識吧。
導遊：拿呢個係 (旅行團單張上寫明的最重點行程) 名古屋城，而家自由時間可以入去參觀下順便影下相，45分鐘後係返呢度集合！
團友心想： @#%X#@%!!!!! 報呢個團就係為左參觀名古屋城，裏面好多日本武士野睇，好多相要影，仲有櫻花！ 得45分鐘，有無搞錯！！
…
…
然後45分鐘後，不情願地趕回來集合，上旅遊巴去到某鄉郊名不經傳的 「特產店」，通常賣所謂手工藝品，地毯，瓷器之類：
導遊：我地會係度留2個鐘，參觀下他們的造瓷技術，最後大家可以考慮下買一兩件返香港，香港買唔到架！
4. 領隊導遊經常分享 「養生，減肥」 類資訊
通常導遊講解當地景點的歷史由來，與當地風土人情，講到無野好講時，都喜歡將話題轉到養生之類
導遊：香港d水同日本呢邊唔同。香港d水除了鉛水，仲有好多氯氣架！所以最好開水放一晚先至煲水，如果唔係對身體係非常差架！仲有香港唔係好興用濾水器，其實非常需要用，日本呢邊個個都用，所以日本人咁長壽！
全車師奶阿叔立即大為緊張，紛紛詢問邊隻日本牌子濾水器好用…
5. 諷刺的是：領隊導遊通常係煙剷
一有任何空檔，領隊導遊司機齊齊食煙
說好的養生呢
6. Sell你野
除了如上：上旅遊巴去到某鄉郊名不經傳的 「特產店」，通常賣所謂手工藝品，地毯，瓷器之類
還有比張填表你洽購 貴旅行社獨家代理的當地名產小食！
平心而論，除了包裝通常特別老土之外（帶返香港做手信，朋友都以為係XX良品買的），有d係幾好食…
7. 小費與意見表
一到旅程最後2日，領隊導遊都會把握機會在旅遊巴上告訴你：
小弟阿 Kelvin帶團都大大話話帶左15年，一畢業就帶架啦，過年都要同要出來帶團，雖然Kelvin呢幾日同大家一齊玩都好開心，其實真係好羨慕在座各位一家大細開開心心旅行。
雖然講錢傷感情，但Kelvin仔細老婆嫩，而且公司底薪真係非常低，真係無計。 如果Kelvin呢幾日服侍大家都尚算滿意，希望大家都可以小費方面手鬆d，出來玩，最重要係咩？ 無錯啦，係開心！ 最緊要大家覺得Kelvin服務大家算周到，Kelvin已經好開心，但如果意見表全部填滿意，Kelvin就更加開心啦….
團友眾笑，然後準備現金。
8. 有緣再會
旅行團短短幾日，與團友可能成為點頭之交
偶然也有一兩個比較投契
在異地的古跡可能有過對歷史的一番見解的一席話
也可能只是在新宿或東京的outlet分享過如何血拚日本版burberry的coupon
無論如何，也有可能會交換聯絡方法
然而，其實絕大部份團友（無論有否交換contact），除非是非常的緣分，雖然曾經在異地投契的一席話，基本上你一輩子不會再遇上他們。
勸君更進一杯酒 西出陽關無故人
就是這個意思
sourcestealjobs.com
|
鍾意就快D Share啦！
|
|
|
