同三五知己去茶樓飲茶 嗌啲乜野食先至係最好？
計我話，識食嘅一定係食雞扎。
點解？我假設你地有五個人，
蝦餃同燒賣，一籠得個三四粒你點樣分比五個人食呢？
反之，雞扎就完全唔同，
一件雞扎滿足左你五個願望：
雞件、火腿、魚肚、芋頭仲有腐皮。
樣樣都係世界級。
之不過當你嗌左雞扎，
正常人一定係爭住件雞件嚟食，
正如好多既球迷都會去捧C朗同美斯。
我唔會話呢班人唔識食，
之不過，喺一件雞件唔可以同時分比五個人嘅情況下，
我教你一個方法可以唔駛再同呢班無知嘅人爭餐懵，
就係主動去食精華中嘅精華 -- 芋頭。
芋頭 ，可能係雞扎五樣主要材料入面最唔受注目。
佢實而不華既程度，有如利物浦嘅軒達臣同阿根廷嘅馬斯查蘭奴。
之不過，將芋頭放喺雞扎入面。
你就會發現呢舊芋頭升值百倍：
一件雞紮好唔好食，
只要食一啖芋頭就知。
芋頭本身煮得唔夠耐就會硬，
太耐就會融。
一件恰到好處嘅雞扎,一定就會有一件恰到好處既芋頭。
恰到好處嘅芋頭會吸收曬其餘四樣材料係蒸煮時候嘅精華，
一咬落去，所有嘅雞汁、火腿汁、魚肚汁全部都融入曬喺芋頭入面，
再加上芋頭原來獨有嘅平實而唔令人覺得花巧嘅獨特味道，
簡直就係一隊足球隊踢得好唔好嘅重要指標。
食左佢嘅話，你就會發現其他既材料都變得唔再重要。
球王就算企定定，都影響唔到比賽。
講到呢度，相信大家都會明白，去茶樓飲茶，
識嗌嘅一定係嗌雞扎。
識食雞扎嘅，一定係食芋頭。
來源 source: http://ww.circle01.com
|
鍾意就快D Share啦！
|
|
|
