成世人流流長，槽，總要跳過幾次。閃前散個靚水餅是學問，亦是藝術。
近日有極品港女隨餅附送紅色炸彈，同事難免口黑面黑。
打工仔劈炮史中可以列出10萬個點解要派餅的原因，但有些事情不做，都總會有個理由的。
散水唔派餅6原因：
1 .「我又唔係做咗好耐……」
對於一眾「短命仔」而言（即Part time、Intern、Probation 都未過之人），其實唔派餅又好難怪。試諗諗，只賺幾個月人工，車費飯錢唔再講，若公司上上下下為數不少，分分鐘要倒貼份糧。
2.「我對呢家公司無乜感情」
「無感情」3隻字，可圈可點。姑勿論人事關係、份工問題，還是一心想跳槽而令到自己無心戀戰。一句到尾，感情呢家野，只有自己先最清楚。
3. 「其實我只係一個小薯仔」
辦公室每事每物都講階級，就連散水餅亦唔例外。
有人視派餅為一種比賽，但有更多「打工薯仔」認為，花一筆錢去餵班「Sydney Mouse」同事，同扣自己人工無分別囉！
4. 「人做我做無啲Style」
雖說派餅是不少打工仔的「閃前」動作，唯散水Style各花入各眼。
餅，笨唔係唯一出路。閣下即管放膽去突破派餅傳統，發揮創意去發掘屬於自己的獨特散水禮。
5.「過咗Last day都唔會再見啦~」
話明「Last day」，一般都後會無期。所謂「過咗海就係神仙」，就算事後被人唱，都無須再有顧忌。
更何況，「好嚟好去」未必一定要靠件餅嘅……
6.「請同唔請無分別」
人走茶涼，Sad but true。
身處「食餅仲多過食鹽」的職場，那年那日你請過我食的一件餅，不用說是甚麼口味，甚至連「請」呢個動作，都已經忘記得一乾二淨。
派散水餅的藝術 識撈 vs 抵死之選
每個打工仔總免不了跳幾次槽，離職前的最後任務，當然少不了散個靚水。
派散水餅不但是一門高深的學問，亦是一種高深莫測的藝術，因為一件餅足以影響你在其他同事心中的印象。
正所謂「山水有相逢」，就算不打算吃「回頭草」，亦可能在他日有碰面或合作的機會。
在職場打滾多年的老手，散水餅亦吃過不少，究竟「識撈」之人會派甚麼餅？
1. 「識撈」之最－投老闆所愛
「識撈」之人深明散水餅的學問，送給老闆的散水餅當然不能夠寒酸失禮，事關「今日留一線，日後好相見」，假如他朝一日要回舊公司食回頭草，就看離職前派餅能否做得「好好睇睇」。
最穩陣莫過於送貴價牌子巧克力，當然亦可以投其所好，例如老闆是愛咖啡之人，不妨按他的喜好送贈咖啡豆；女士們就送她賣相漂亮的杯子蛋糕吧！
方便攜帶度：★★★★
價錢：★★★★
受歡迎程度：★★★★★
（5★為滿分和最貴）
2. 心思之最－精緻甜點類
小編收過最有心思的散水餅是印有每位同事英文名字的馬卡龍，並且分粉藍和粉紅色，分別派給男同事和女同事。
另外，不同味道的手工曲奇亦可見出派餅同事的心思。別出心裁的散水餅的確為離職的同事加了不少分，一個「華麗轉身」走得漂漂亮亮，同時亦可在離職時與同事保持友好關係。
方便攜帶度：★★★★
價錢：★★★★
受歡迎程度：★★★★★
（5★為滿分和最貴）
3. 性價比之最－西餅？蛋撻
相信不少人在離職時都會選擇派發西餅，貪其得體之餘，價錢亦十分相宜，價錢約由7？8元至20元。假如手上有一兩張餅劵，就更「慳皮」！
另外，蛋撻亦是不錯的選擇，尤其是熱騰騰？香噴噴的拿到公司，更是令人垂涎三尺，最適合在下午茶的時候拿出來慰勞同事！
最重要是蛋撻價錢亦十分相宜，「cheap cheap雞」的可入手茶餐廳10元3個的蛋撻，想較為體面亦可購買8元一個的東X堂鮮奶撻，豐儉由人！
方便攜帶度：★★★
價錢：★
受歡迎程度：★★★
（5★為滿分和最貴）
4. 弦外之音－水果
水果可謂最「抵食夾大件」的散水餅，價錢便宜之餘亦份量多多。有些在離職時「我有說話未曾講」的同事會藉此良機憑餅寄意，假如你收到一條蕉作為散水餅的話，你應該好好的想一想你跟這位同事有沒有甚麼過節……
方便攜帶度：★★★★★
價錢：★
受歡迎程度：★
（5★為滿分和最貴）
5.「慳皮」之選－零食
有人曾收到離職同事的一大包棉花糖……的其中一粒，對方覺得可笑又無奈，心想「不如唔好派」。有些人亦會帶一大盒曲奇或巧克力回辦公室，讓同事自行拿取。
方便攜帶度：★★★★★
價錢：★
受歡迎程度：★★
（5★為滿分）
一件散水餅足以流露出你跟同事和上司之間的愛恨情仇，不知道當你在他日跳槽時，會否派散水餅給你最討厭的同事？
facebook pagehttps://www.facebook.com/higoldenbrothers/?ref=bookmarks
|
鍾意就快D Share啦！
|
|
|
