尾場同林海峰都放盡 秋生口琴奏《願榮光歸香港》 _-,林海峰,黃秋生,

.mobile-ads{display:none;}@mediaonlyscreenand(max-width:767px){.desktop-ads ...

林海峰（Jan）前晚完成在紅館一連七場的「是但噏」騷，尾場當然瞓身放盡演出，除又唱又跳近日熱爆的屯門Happy伯及娜娜的開心舞外，Jan跟嘉賓黃秋生及葛民輝合體更掀起全晚高潮，其中秋生除狂寸特首林鄭月娥人工高、講廢話外，更形容她為「Yellow Object」，最後秋生以口琴吹奏出《願榮光歸香港》，全場觀眾亮起手機燈附和，合力為香港加油。林海峰前晚於紅館舉行尾場「是但噏」騷，入場觀眾如之前幾場一樣，齊心大叫：「五大訴求，缺一不可」、「香港人加油」、「香港警察知法犯法」等，更大合唱《願榮光歸香港》和《有班警察毅進仔》，唱畢觀眾以掌聲互勉。前晚到來捧場的有俞琤、徐天佑、張繼聰與謝安琪夫婦及錢嘉樂與湯盈盈夫婦等，林海峰的家人也有捧場，但老婆彭羚卻未有現身觀眾席。



Jan前晚準時八時半現身，全場即大叫「林狗下台」，跟觀眾熱身後便返後台換衫正式開騷。當晚Jan在台上依舊揮灑自如，但講到彭羚及及兩個女兒林泳和林清時，他忽然大發台瘟：「佢兩個已經變成建制派，佢哋黨魁，即係我太太啦……我竟然同噚晚一樣click喺呢個位。」Jan即自我回帶再講多一次，怎料又出錯，他自嘲：「今晚係最後一場，仲要錄影，我唔會講呢兩句講到10點啩。」結果他要到第四次才順利完成，觀眾拍掌鼓勵，但Jan隨後又老貓燒鬚再出錯，他原本要說：「有乜嘢比金錢更重要，就係自由。」但他卻講錯成：「有乜嘢比自由更自由。」Jan笑言因爆了女兒不少私隱，擔心很難𠱁回15歲細女林清；他亦有講述小時候與弟弟林曉峰的趣事，搞笑地特別答謝媽咪當年以藤條打他。

騷上Jan除獻唱，還跳近日網上熱爆的屯門娜娜及Happy伯的開心舞，雖身穿全套灰色西裝，但他依然瞓身趴地又唱又跳，全場歡呼更大呼「安哥」。現場有女觀眾向Jan送花，他接過花後笑說：「做咗七晚只係收到一紮花，都係經典，其實係咪喺隔籬大館（殯儀館）拎嚟。」



其後，Jan和嘉賓黃秋生及葛民輝上演時下辦公室境況，身穿金色西裝的秋生現身，依舊出言暗嘲香港現況，他先搞笑問：「咁多人喺現場聚集，係咪合法？」又叮囑大家要及早離開，以免港鐵停駛。講到辦公室人物，秋生笑說：「有種高層係眼細細，着件旗袍，成日講廢話，又人工高，嗰啲叫yellow object。」到葛民輝出場，三人在台上問觀眾是否不走，觀眾即大叫不走，秋生聞言說：「再唔走就放煙，大家唔走唔好打爛公司啲嘢，拎支筆扑你個頭。」接着秋生以口琴吹奏出兒歌《有隻雀仔跌落水》，全場歡呼拍掌，秋生笑謂：「呢班人咁得意，咁鍾意聽兒歌。」之後再獨奏《願榮光歸香港》，全場觀眾即亮起手機燈光附和，最後在觀眾齊叫「香港人加油」下完場。

去片：

來源 source: http://lam777.com

鍾意就快D Share啦！

下一篇 》