曾選港男的健身教練梁裕恆（Flow）繼續開腔力撐黃心穎，除了早前指「個男人同佢講會離婚，她才願意跟他一起。」外，昨日再拍了條四分半鐘的影片質疑有人設局陷害心穎，仲話自己:「斷送了前途！但是問心無愧！」。
全文：
各位網友大家好，由我發表嗰篇文章之後，網上嘅論調開始有所改變，再唔係單純簡簡單單咁去講成件事對定錯，而係大家去尋求真相，因為成件事有好多唔合理地方，好值得大家去思考。
咁我以下落嚟拍呢段片嘅目的，就係講番個真相畀大家聽，有興趣追求真相嘅人可以留低，冇興趣嘅人可以離開，或者睇完繼續鬧我都冇問題，對我完全冇影響。嚟緊我會問大家一啲問題，大家可以自己去思考一下，唔好淨係聽我去講，到最終我會畀番答案大家。
喺4月2號嗰晚，呢段關係已經發生咗兩年，有幾多人係知道呢件事，有幾多人係鬼？第1條。
第2條，樓下有幾多架的士喺度，佢哋上咗唔同的士，會唔會有唔同答案？唔同嘅結果出現呢？
第3條，車入面有4個角色，一個負責揸車嘅，一個係第三者，即係肥仔，冇咗肥仔成件事能唔能夠成功呢？嗰個揸車嘅係咪又係單純係揸車咁簡單？香港所有車都係右軚，而所有車cam正常都係會影住左手邊，因為乘客通常都係喺左手邊上落，當晚許志安坐右手邊，點解個車cam一早會對住右手邊？佢點樣可以一早預先知道許志安會坐喺右手邊呢？車入面邊個角色做到呢件事？
一般普通人嚟講，都唔會喺的士攬攬錫錫，點解？即使冇車cam喺度都好啦，因為始終有個第三者喺度，點解要咁做？而且佢哋係知名人士，許志安呢啲咁經驗豐富嘅藝人，正常唔會犯呢啲咁低級嘅錯誤，一定有原因。會唔會係個司機本身就係相熟、知道呢件事呢？
呢兩年嘅關係，知道呢件事嘅人其實有幾多呢？會唔會雙方嘅伴侶其實都知道呢件事呢？坊間有流傳佢哋嘅關係其實係默許咗嘅，鄭同許都默許咗大家出去玩，但係許會唔會有機會玩出咗真感情，會唔會係一方想報復呢？發生咗整件事後，最大得益係邊個？喺經濟上最大得益者，邊個宣傳大咗？邊個知名度高咗？邊個受人同情咗？
我相信問到呢度，大家心入面都有答案，大家開始知道成件事並唔係咁簡單嘅桃色事件。我係一個負責問問題嘅人，答案交番畀大家自己諗，呢個世界唔係每一樣嘢都有答案，但大家一定要識得去問問題。
發展到呢件事之後，許志安出嚟開記者招待會，佢話自己飲醉咗酒，色心起，佢嘗試將呢件事變做一段性愛關係，變咗一件桃色事件，絕對唔係！呢件事並唔係當日發生，並唔係大家所睇到嘅所謂嘅勾引、主動，因為關係已經一段時間，所以係唔存在勾引或者主動，大家去諗番清楚呢一點。
然後到鄭秀文嘅聲明、馬國明出嚟見記者，馬國明嘅態度，好似覆述緊一個第三者嘅事，完全睇唔出有任何傷心嘅，大家形容佢係一個好男人，我形容，大家從來都冇愛過，如果愛過，就係冷血㗎喇。同樣，鄭秀文亦都係吖，當晚就話捉住大家隻手，然後就話祈禱，然後就傾咗好多偈，大家有冇試過嬲過你老公？發生咗一個咁大嘅事件，即晚去原諒，有冇可能呀？會唔會只係一個公關嘅技巧，背後嘅原因係咩呢？會唔會係一啲商業嘅考慮呢？
點解我會企出嚟幫阿黃心穎，因為佢唔係賣，喺社會上、喺娛樂圈，呢啲事情係不斷發生嘅。喺娛樂圈發生咗好多咁嘅事情，係冇人追究過，但今次，全城都喺度咁『蝦』一個咁嘅女仔，點解？因為許志安冇樣？因為許志安冇錢？啲而家所謂嘅模範夫妻，曾經搞過人哋家庭、拆散人哋家庭，冇俾人話過，點解？因為佢咁就值得人尊敬、值得人欣賞？大家咁樣睇嘢㗎咩？而家係笑貧不笑娼㗎咩？的確係，真係而家好多人係咁。
好多人話我出嚟抽水，我知我咁樣講，可能以後連嘢都唔需要拍啦，我知道一定會俾網民不停咁圍攻，因為點解？因為大家唔思考、唔諗嘢、唔會追求真相㗎嘛！不過我亦都知道，好多都只不過係網絡打手，全部假account，空號嚟嘅，點解會有人想盡快平息呢一件事呢？都係一個商業考慮。咁慢慢已經有報章去報道，或者有網上評論員去越講越接近個真相，我相信好快會還我一個清白。
Flow 的影片上傳到 YouTube 後，又自己轉發到Facebook，並留言:「斷送了前途！但是問心無愧！」不過唔知咩原因， Flow 其後在11點半左右就刪除了YouTube 的影片。
不過有 Backup (完整 4:33 mins):
來源 source: http://circle01.life
|
鍾意就快D Share啦！
|
|
|
