陳少寶口話唔嬲，不過講起突然被炒就好多不滿：「驚我喺個節目發癲咩！」
爆 Like王 忽然俾新城炒魷 陳少寶有火：搵個理由出嚟答我囉！
Ads by Google
電台界大地震，新城更係重災區， 61歲前輩級 DJ人物陳少寶（原名：陳世明），亦成為開刀對象， 1978年喺商台出身，經典「 6pair半」成員之一，去過港台， 08年開始喺新城主持《少寶與文狄》，收聽率高但突然被裁，令呢位播音界 37年嘅前輩都有啲脾氣（佢千叮萬矚唔好寫佢唔開心！）他說：「佢哋冇顧及聽眾感受，點解唔俾我向聽眾講再見？你驚我喺節目發癲咩？」
除 DJ外，少寶哥亦曾在唱片界打滾多年，做過張國榮老闆、發掘過王菲同張敬軒，但佢冇諗過食老本，識玩 facebook，仲聽緊 Justin Bieber、 Sam Smith同坤哥，嚟緊會大搞一隊台灣網上女子組合，亦力撐廣東歌有得做。老馬有火，少寶哥絕不 Old Seafood。
F：《 FACE》陳：陳少寶
F：節目多人聽都被炒，有咩感覺？
《少寶與文狄》播咗 7年，陳少寶不時搞 fans聚會，次次都坐爆，堅係多人聽嘅。（網上圖片）
陳：我依家睇落有啲脾氣啦，其實係因為諗起我啲聽眾，點解佢哋唔去理聽眾嘅感受?佢哋支持咗我咁耐，都希望我哋講下再見喎，或者八卦啲，想知我咩事走好合理，佢哋想知道，點解公司唔俾我講再見？你驚我咩？你驚我喺節目度發癲？我由 1978年做電台（商台 6pair半成員之一）到依家從來冇試過闖過禍，你覺得我會因為佢將我擺去瘦身嗰邊而喺節目發癲咩？佢太過低估我喇，同唔尊重我。
我呢個節目最高收聽率，佢哋做過調查㗎，你可以問佢攞，如果節目收聽率高嘅，都賣唔到廣告，你應該炒營業部，炒我做咩啫？我唔係唔開心喎，請大家……你千祈唔好寫我唔開心，我唔知幾開心，我開心先可以咁大聲，我唔開心講粗口啦，但我冇喎。我問過係咪因為我係阿銳（前台長朱明銳亦被退休）啲人？佢話唔係，我唔做揣測，仲測嚟做咩？答我啦，夠膽！搵個理由出嚟答我囉。
F：點解後生仔鍾意聽商台唔聽新城？
前新城台長朱明銳，一手帶陳少寶入新城，銳哥被離場，少寶亦深知一朝天子一朝臣，不過就唔滿意高層嘅處理手法。（網上圖片）
新：新城知訊台行緊方針係好㗎，因為主要行女性，家庭主婦方向，你唔好睇低家庭主婦呀，佢哋消費能力高㗎，美容呀，酒樓打牌多數都係家庭主婦㗎啦，呢樣嘢我讚阿銳㗎，係佢諗出嚟，呢個係高招嚟㗎。
F：新城頒獎禮分豬肉冇認受性？
新：你唔鍾意分豬肉啫，你去問下啲歌星啦，歌星可能覺得分豬肉，分多嚿好開心㗎，我哋唔可以咁主觀去定人哋嘅喜好，我亦答你唔到，我冇參與到佢哋音樂會製作，分豬內係咪好唔專業呢？唔分豬肉係咪專業啲呢？咁你咪去睇下嗰啲好專業嘅係咪真係咁專業囉？我點知呀？
F：大家想爭取年輕人市場，點解新城反而放棄呢？
新：錯，尤其係夕陽嘅時候，難做嘅時候，應該爭取有消費力嘅人，呢個消費力唔代表係年青人，依家所有嘅香港嘅年青歌手唱片同演唱會都唔賣得，香港最賣得嘅演唱會，係咩年紀嘅歌手呀？講完啦，你哋自己諗啦。唔好攞韓國比較，韓國係一個世界大潮流，香港點可以同佢比較呢？
F：香港流行曲冇以前咁 hit？
陳少寶當年發掘王菲， 80、 90年代好多歌星都係佢簽返嚟！（網上圖片）
陳：我眼見嘅香港後生仔，依家最有興趣嘅，最積極參與嘅就係政治討論，但香港唱片唔寫得政治歌呢類體材，如果寫咗政治歌好多媒介可能戴有色眼鏡，又驚得罪阿公，最熱門題目製作人冇得創作，或者唔鼓勵創作，咁香港點會有流行曲呢？流行曲就係講社會嘅現象嘛，依家嘅現象就係關心社會或者對社會不滿，但你睇電台播嘅歌，所謂主流，有幾多係呢種題材？所以咪唔流行囉。
F：你識唔識坤哥？如果佢 10年前出現，你會簽佢嗎？
陳少寶當年聽過張敬軒唱〈 My Way〉，未見過真人就話要簽佢，果然耳功獨到，軒仔亦視少寶為伯樂。（網上圖片）
陳：坤哥本人我唔認識，不過我聽過佢近期兩隻歌，做得唔錯！聽坤哥最近嗰隻歌，我覺得有張敬軒嘅影子，我係發現張敬軒嘅人，咁你話喇，如果我喺度嘅時候，我會唔會簽坤哥？我相信我會。
F：廣東歌仲有冇得做？
陳：講廣東話嘅人仲有 2、 3億，點解唔做啫?我簽咗隊組合叫「她她」，兩個女仔喺 YouTube都有一定嘅點擊率，佢哋係台灣人，但我都叫佢哋學好啲廣東話，要唱廣東歌，因為做國語歌我唔拿手，廣東歌我有信心。你要去唱國語歌，求其喺香港搵個老師教你國語點發音，然後唱一隻香港人寫嘅國語歌，會唔會好 hit呢?你估咁容易咩?點解鬼佬唱廣東歌唔得呢?就算佢唱到字正腔圓都唔得，因為唱歌係講感情、感受。佢要喺嗰度生活，熟習咗當地嘅文化，唱出嚟先有共鳴。
|
鍾意就快D Share啦！
|
|
|
